المستدرك على الصحيحين

محمد بن عمر اپنے شیوخ سے عتبہ بن غزوان رضی اللہ عنہ کے ذکر میں روایت کرتے ہیں کہ ان کی کنیت ابو عبد اللہ تھی اور ایک قول کے مطابق ابو غزوان تھی، ان کے متعلق منقول ہے کہ وہ دراز قد اور وجیہ انسان تھے، وہ قدیم الاسلام صحابہ میں سے تھے اور انہوں نے سرزمین حبشہ کی طرف دوسری ہجرت کی تھی، وہ رسول اللہ ﷺ کے اصحاب میں نامور تیر اندازوں میں شمار ہوتے تھے، انہوں نے ہی بصرہ شہر کو آباد کیا تھا، ان کی وفات سیدنا عمر بن خطاب رضی اللہ عنہ کے دورِ خلافت میں معدن بنی سلیم کے مقام پر ہوئی جب وہ سیدنا عمر کی طرف سے بصرہ کے گورنر کی حیثیت سے وہاں جا رہے تھے، پھر ان کا غلام سوید ان کا سامان اور ترکہ لے کر سیدنا عمر کے پاس حاضر ہوا، ابن عمر فرماتے ہیں کہ عتبہ بن غزوان کی وفات سنہ 15 ہجری میں ہوئی اور ایک قول کے مطابق 17 ہجری میں ہوئی جبکہ ان کی عمر 57 برس تھی۔

عروہ سے روایت ہے کہ سیدنا عتبہ بن غزوان رضی اللہ عنہ رسول اللہ ﷺ کے ہمراہ غزوہ بدر میں شریک ہوئے تھے۔

محمد بن عبد اللہ بن نمیر کہتے ہیں کہ عتبہ بن غزوان رضی اللہ عنہ کی وفات سنہ 17 ہجری میں ہوئی اور وفات کے وقت ان کی عمر 57 سال تھی۔