المستدرك على الصحيحين

خالد بن سعید بن عمرو بن سعید اپنے چچا خالد بن سعید اکبر رضی اللہ عنہ سے روایت کرتے ہیں کہ جب وہ حبشہ سے رسول اللہ ﷺ کی خدمت میں حاضر ہوئے تو ان کے ساتھ ان کی صاحبزادی ام خالد بھی تھیں، وہ انہیں رسول اللہ ﷺ کے پاس لائے تو انہوں نے زرد رنگ کی قمیص پہن رکھی تھی جو اس بچی کو بہت بھلی معلوم ہو رہی تھی، وہ حبشہ کی زبان کے کچھ الفاظ سمجھتی تھیں تو رسول اللہ ﷺ نے ان سے حبشی زبان میں خوش طبعی فرماتے ہوئے کہا: «سَنَهْ سَنَهْ» جس کا حبشی زبان میں مطلب ”اچھا، اچھا“ ہے، پھر رسول اللہ ﷺ نے ان کے لیے طویل عمری کی دعا فرماتے ہوئے فرمایا: «أَبْلِي وَأَخْلِقِي، أَبْلِي وَأَخْلِقِي» ”تم اسے پرانا کرو اور بوسیدہ کرو، تم اسے پرانا کرو اور بوسیدہ کرو“، راوی کہتے ہیں کہ اللہ کی قسم! انہوں نے ان کپڑوں کو خوب پرانا کیا اور پھر نئے کپڑے پہننے کی سعادت پائی، پھر وہ بچی رسول اللہ ﷺ کی پشت کی طرف مائل ہوئی اور مہرِ نبوت پر اپنا ہاتھ رکھ دیا، ان کے والد نے انہیں روکنا چاہا تو رسول اللہ ﷺ نے فرمایا: ”انہیں چھوڑ دو (کچھ نہ کہو)۔“
یہ حدیث صحیح الاسناد ہے، کیونکہ شیخین نے اسحاق بن سعید بن عمرو بن سعید کی اپنے آباؤ اجداد اور چچاؤں سے مروی احادیث کی تخریج پر اتفاق کیا ہے، اور یہ وہی ام خالد بنت خالد بن سعید بن العاص ہیں جنہیں ان کے والد بچپن میں رسول اللہ ﷺ کی خدمت میں لائے تھے، انہوں نے رسول اللہ ﷺ کی صحبت پائی اور آپ سے احادیث بھی روایت کیں۔

سیدہ ام خالد بنت خالد بن سعید بن العاص الکبریٰ رضی اللہ عنہا بیان کرتی ہیں کہ میں نے رسول اللہ ﷺ کو عذابِ قبر سے پناہ مانگتے ہوئے سنا۔
صفوان بن مخرمہ زہری رضی اللہ عنہ کے مناقب کا ذکر: