المستدرك على الصحيحين

سیدنا جابر رضی اللہ عنہ سے روایت ہے کہ سیدنا عمر بن خطاب رضی اللہ عنہ نے ابوقحافہ رضی اللہ عنہ کا ہاتھ پکڑا اور انہیں نبی کریم ﷺ کی خدمت میں لے آئے، جب وہ رسول اللہ ﷺ کے سامنے کھڑے ہوئے تو آپ ﷺ نے (ان کے سفید بالوں کو دیکھ کر) فرمایا: «غَيِّرُوهُ وَلَا تُقَرِّبُوهُ سَوَادًا» ”اس (سفیدی) کو بدل دو (یعنی خضاب لگا لو) لیکن کالے رنگ کے قریب نہ جاؤ۔“

زید بن اسلم سے روایت ہے کہ رسول اللہ ﷺ نے سیدنا ابوبکر صدیق رضی اللہ عنہ کو ان کے والد کے اسلام لانے پر مبارکباد پیش فرمائی۔

سیدنا جابر رضی اللہ عنہ سے روایت ہے کہ فتح مکہ کے دن ابوقحافہ کو نبی کریم ﷺ کی خدمت میں لایا گیا، ان کے سر اور داڑھی کے بال ”ثغامہ“ (سفید پھولوں والی بوٹی) کی طرح بالکل سفید تھے، تو رسول اللہ ﷺ نے فرمایا: ”ان کی داڑھی کو (خضاب لگا کر) بدل دو۔“

سیدنا انس رضی اللہ عنہ سے روایت ہے، وہ فرماتے ہیں کہ گویا میں ابوقحافہ کی داڑھی کی طرف دیکھ رہا ہوں جو (خضاب کی) گہری سرخی کی وجہ سے ایسی لگ رہی تھی جیسے دہکتا ہوا ”عرفج“ (ایک صحرائی درخت) ہو، تو رسول اللہ ﷺ نے سیدنا ابوبکر رضی اللہ عنہ سے فرمایا: ”اگر تم ان بزرگ کو ان کے گھر میں ہی رہنے دیتے تو ہم خود (ان کی عزت افزائی کے لیے) ان کے پاس چلے جاتے“، یہ آپ ﷺ نے ابوبکر صدیق رضی اللہ عنہ کی تکریم کی خاطر فرمایا۔