المستدرك على الصحيحين

سیدنا عبداللہ بن عباس رضی اللہ عنہما سے روایت ہے کہ جب سیدنا ضرار بن ازور رضی اللہ عنہ اسلام لائے تو نبی کریم ﷺ کی خدمت میں حاضر ہوئے اور یہ اشعار پڑھے: ”میں نے جوئے کے تیر، سارنگیوں کی آواز اور شراب کو چھوڑ کر اب نماز اور گریہ و زاری کو اپنا لیا ہے، اب میرا شوق عمرہ میں اللہ کی حمد و ثنا کرنا اور مشرکین کے خلاف قتال میں اپنی پوری کوشش صرف کرنا ہے، میری بیوی جمیلہ نے کہا کہ تم نے ہمیں برباد کر دیا اور اپنے اہل و عیال کو منتشر کر کے دور پھینک دیا، پس اے میرے رب! میرے اس سودے میں مجھے خسارہ نہ دینا، کیونکہ میں نے اپنے اہل و مال کو (آخرت کے) بدلے میں بیچ دیا ہے۔“ رسول اللہ ﷺ نے فرمایا: ”اے ضرار! تمہارا یہ سودا ہرگز خسارے والا نہیں رہا۔“

خلیفہ بن خیاط بیان کرتے ہیں کہ رسول اللہ ﷺ کے آزاد کردہ غلام سیدنا ابوکبشہ رضی اللہ عنہ کی وفات سن 13 ہجری میں ہوئی۔

محمد بن عمر اپنے شیوخ سے روایت کرتے ہیں کہ رسول اللہ ﷺ کے آزاد کردہ غلام سیدنا ابوکبشہ رضی اللہ عنہ کا نام سلیم تھا، ان کی پیدائش سرزمینِ دوس میں ہوئی تھی، انہوں نے رسول اللہ ﷺ کے ہمراہ غزوہ بدر، احد اور تمام غزوات میں شرکت کی، ان کی وفات سیدنا عمر بن خطاب رضی اللہ عنہ کی خلافت کے پہلے دن ہوئی، جو کہ سن 13 ہجری جمادی الاولیٰ کی بائیس تاریخ بروز منگل کا دن تھا۔