المستدرك على الصحيحين

ابن شہاب سے مروی ہے کہ سیدنا ضرار بن ازور اسدی رضی اللہ عنہ جنگِ اجنادین کے دن شہید ہوئے۔

سیدنا ضرار بن ازور رضی اللہ عنہ سے روایت ہے کہ میں اپنے گھر والوں کی ایک دودھ دینے والی اونٹنی لے کر نبی کریم ﷺ کی خدمت میں حاضر ہوا، آپ ﷺ نے مجھ سے فرمایا: ”اس کا دودھ نکالو“، میں نے اسے پوری طرح نچوڑنا چاہا تو آپ ﷺ نے فرمایا: «لَا تُجْهِدْهَا، دَعْ دَاعِيَ اللَّبَنِ» ”اسے پوری طرح نہ نچوڑو، کچھ دودھ (تھنوں میں) باقی رہنے دو۔“
یہ حدیث صحیح الاسناد ہے، اور ہمیں سیدنا ضرار رضی اللہ عنہ کی رسول اللہ ﷺ سے اس کے علاوہ کوئی اور روایت معلوم نہیں۔ رہا ان کی فضیلت کا معاملہ، تو رسول اللہ ﷺ نے ان کے لیے اس وقت دعا فرمائی جب انہوں نے اپنا وہ قصیدہ سنایا تھا جس کا ذکر اگلی روایت میں ہے۔