المستدرك على الصحيحين

امام زہری رحمہ اللہ سے روایت ہے کہ رسول اللہ ﷺ نے سب سے پہلے جس خاتون سے نکاح کیا وہ سیدہ خدیجہ بنت خویلد بن اسد بن عبدالعزیٰ تھیں، آپ ﷺ نے ان سے جاہلیت کے دور میں نکاح کیا اور ان کے والد خویلد بن اسد نے ان کا نکاح پڑھایا تھا۔

داؤد بن محمد بن ابی معشر اپنے والد اور وہ اپنے دادا سے روایت کرتے ہیں کہ سیدہ خدیجہ رضی اللہ عنہا کی وفات ہجرت سے ایک سال قبل ہوئی۔

محمد بن اسحاق سے روایت ہے کہ ابوطالب اور خدیجہ بنت خویلد رضی اللہ عنہا کا انتقال ایک ہی سال ہوا، اور یہ نبی کریم ﷺ کی مدینہ ہجرت سے تین سال پہلے کا واقعہ ہے، سیدہ خدیجہ رضی اللہ عنہا کو حجون (کے قبرستان) میں دفن کیا گیا اور رسول اللہ ﷺ خود ان کی قبر میں اترے، جس وقت آپ ﷺ نے ان سے نکاح کیا ان کی عمر 28 سال تھی، محمد بن اسحاق کہتے ہیں کہ سیدہ خدیجہ کی کنیت امِ ہند تھی، رسول اللہ ﷺ سے نکاح کے وقت ان کا ایک بیٹا اور ایک بیٹی تھی، خدیجہ کی والدہ کا نام فاطمہ بنت زائدہ بن اصم تھا اور ان کی والدہ ہالہ بنت عبدمناف تھیں۔