المستدرك على الصحيحين

سیدنا عبداللہ بن عباس رضی اللہ عنہما سے روایت ہے کہ سیدنا براء بن معرور رضی اللہ عنہ پہلے شخص تھے جنہوں نے لیلۃ العقبیٰ کے موقع پر انصار کے ستر افراد کی موجودگی میں رسول اللہ ﷺ کے ہاتھ پر بیعت کی، پس براء بن معرور کھڑے ہوئے، اللہ کی حمد و ثنا بیان کی اور پھر فرمایا: ”تمام تعریفیں اللہ کے لیے ہیں جس نے ہمیں محمد ﷺ کے ذریعے عزت بخشی اور ہمیں آپ ﷺ کی صورت میں (رہبر) عطا کیا، ہم پکارنے والے کی پکار پر لبیک کہنے والے اولین اور پکارے جانے والے آخری لوگ تھے، ہم نے اللہ عزوجل کی دعوت قبول کی اور سمع و طاعت کا مظاہرہ کیا، اے گروہِ اوس و خزرج! یقیناً اللہ تعالیٰ نے تمہیں اپنے دین کے ذریعے معزز کیا ہے، لہٰذا اگر تم شکر گزاری کے ساتھ سمع و طاعت اور تعاون و نصرت کا عہد کرتے ہو تو اللہ اور اس کے رسول کی اطاعت کرو،“ پھر وہ بیٹھ گئے۔
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا جابر رضی اللہ عنہ سے روایت ہے کہ سیدہ خدیجہ رضی اللہ عنہا نے رسول اللہ ﷺ کو جرش کی جانب دو تجارتی سفروں کے لیے اجرت پر لیا، اور ہر سفر کی اجرت ایک جوان اونٹنی مقرر کی۔
یہ حدیث صحیح الاسناد ہے لیکن شیخین نے اسے روایت نہیں کیا۔