المستدرك على الصحيحين

سیدنا انس بن مالک رضی اللہ عنہ سے روایت ہے کہ میں نبی کریم ﷺ کے ہمراہ سیدنا علی رضی اللہ عنہ کی عیادت کے لیے گیا جبکہ وہ بیمار تھے اور ان کے پاس سیدنا ابوبکر اور سیدنا عمر رضی اللہ عنہما بیٹھے تھے، وہ دونوں اپنی جگہ سے ہٹ گئے اور رسول اللہ ﷺ وہاں بیٹھ گئے، ان دونوں میں سے ایک نے اپنے ساتھی سے کہا کہ میرا نہیں خیال کہ یہ (علی) اس بیماری سے بچ پائیں گے، تو رسول اللہ ﷺ نے ارشاد فرمایا: ”یہ (علی) ہرگز نہیں مریں گے مگر یہ کہ انہیں شہید کیا جائے گا، اور وہ اس وقت تک نہیں مریں گے جب تک کہ وہ (باطل کے خلاف) غیظ و غضب سے بھر نہ دیے جائیں۔“

سیدنا ابو ایوب انصاری رضی اللہ عنہ نے سیدنا عمر بن خطاب رضی اللہ عنہ کے دورِ خلافت میں بیان فرمایا: ”رسول اللہ ﷺ نے سیدنا علی بن ابی طالب رضی اللہ عنہ کو «ناكثين» (بیعت توڑنے والوں)، قاسطین (ظالم و سرکش گروہ) اور «مارقين» (دین سے نکل جانے والے خارجیوں) سے قتال کرنے کا حکم دیا تھا۔“

سیدنا ابو ایوب انصاری رضی اللہ عنہ بیان کرتے ہیں کہ میں نے نبی کریم ﷺ کو سیدنا علی بن ابی طالب رضی اللہ عنہ سے یہ فرماتے ہوئے سنا: ”تم ناکثین، قاسطین اور مارقین سے راستوں پر، نہروانات میں اور پہاڑی چوٹیوں پر قتال کرو گے۔“ سیدنا ابو ایوب انصاری فرماتے ہیں کہ میں نے عرض کیا: اے اللہ کے رسول! میں ان لوگوں کے خلاف کس کے ساتھ مل کر قتال کروں؟ آپ ﷺ نے فرمایا: ”علی بن ابی طالب کے ساتھ۔“

سیدنا علی رضی اللہ عنہ سے روایت ہے، انہوں نے فرمایا: ”بے شک ان باتوں میں سے جن کا نبی کریم ﷺ نے مجھ سے عہد لیا تھا ایک یہ بھی ہے کہ عنقریب یہ امت میرے بعد میرے ساتھ بے وفائی اور غداری کرے گی۔“
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا عبداللہ بن عباس رضی اللہ عنہما سے روایت ہے کہ نبی کریم ﷺ نے سیدنا علی رضی اللہ عنہ سے فرمایا: ”آگاہ رہو کہ میرے بعد تمہیں بڑی مشقت اور آزمائش کا سامنا کرنا پڑے گا۔“ انہوں نے عرض کیا: ”کیا اس وقت میرا دین سلامت رہے گا؟“ آپ ﷺ نے فرمایا: ”ہاں، تمہارا دین سلامت رہے گا۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔