المستدرك على الصحيحين

سیدنا علی رضی اللہ عنہ سے روایت ہے، انہوں نے فرمایا: جب میں نے عراق جانے کے ارادے سے اپنا پاؤں رکاب میں رکھا تو سیدنا عبداللہ بن سلام رضی اللہ عنہ میرے پاس آئے اور کہا: ”عراق نہ جائیں، کیونکہ اگر آپ وہاں گئے تو آپ کو تلوار کی دھار کا سامنا کرنا پڑے گا۔“ سیدنا علی رضی اللہ عنہ نے فرمایا: ”اللہ کی قسم! یہ بات مجھ سے تم سے پہلے رسول اللہ ﷺ نے فرمائی تھی۔“ ابوالاسود کہتے ہیں کہ میں نے اپنے جی میں کہا: سبحان اللہ! میں نے آج کے دن جیسا منظر نہیں دیکھا کہ ایک جنگجو شخص لوگوں کو اس طرح کی (اپنی شہادت کی) باتیں بتا رہا ہے۔
یہ حدیث شیخین کی شرط پر صحیح ہے لیکن شیخین نے اسے روایت نہیں کیا۔

سیدنا عمار بن یاسر رضی اللہ عنہ سے روایت ہے کہ میں اور علی رضی اللہ عنہ غزوہ ذات العشیرہ میں ایک دوسرے کے رفیق تھے، جب رسول اللہ ﷺ وہاں پہنچے اور قیام فرمایا، تو ہم نے بنی مدلج کے کچھ لوگوں کو دیکھا جو کھجوروں کے باغ میں اپنے ایک چشمے پر کام کر رہے تھے، علی رضی اللہ عنہ نے مجھ سے کہا: ”اے ابواليقظان! کیا تمہارا ارادہ ہے کہ ہم ان لوگوں کے پاس چلیں اور دیکھیں کہ وہ کیسے کام کرتے ہیں؟“ چنانچہ ہم ان کے پاس گئے اور کچھ دیر ان کا کام دیکھا، پھر ہمیں نیند نے آلیا، میں اور علی رضی اللہ عنہ وہاں سے چلے اور کھجوروں کے ایک جھنڈ میں خشک مٹی پر لیٹ گئے اور سو گئے، اللہ کی قسم! ہمیں کسی نے نہیں جگایا سوائے رسول اللہ ﷺ کے، آپ ﷺ ہمیں اپنے پائے مبارک سے ہلا رہے تھے، اور ہم اس مٹی سے اَٹ گئے تھے، رسول اللہ ﷺ نے مٹی دیکھ کر فرمایا: ”اے ابوتراب!“ پھر آپ ﷺ نے فرمایا: ”کیا میں تمہیں دو سب سے زیادہ بدبخت انسانوں کے بارے میں نہ بتاؤں؟“ ہم نے عرض کیا: کیوں نہیں اے اللہ کے رسول! آپ ﷺ نے فرمایا: ”ایک تو قومِ ثمود کا وہ سرخ مائل رنگت والا شخص جس نے اونٹنی کی کونچیں کاٹی تھیں، اور دوسرا (اے علی!) وہ شخص جو تمہارے یہاں یعنی سر کے اس حصے پر ضرب لگائے گا یہاں تک کہ اس (خون) سے یہ یعنی تمہاری داڑھی تر ہو جائے گی۔“
یہ حدیث امام مسلم کی شرط پر صحیح ہے لیکن شیخین نے اسے اس زیادتی کے ساتھ روایت نہیں کیا، انہوں نے صرف ابوحازم کی سہل بن سعد سے مروی حدیث «قُمْ أَبَا تُرَابٍ» ”اے ابوتراب! اٹھو“ پر اتفاق کیا ہے۔