المستدرك على الصحيحين

ابو عبد اللہ جدلی سے روایت ہے کہ میں سیدہ ام سلمہ رضی اللہ عنہا کی خدمت میں حاضر ہوا تو انہوں نے مجھ سے پوچھا: «أَيُسَبُّ رَسُولُ اللَّهِ ﷺ فِيكُمْ؟» میں نے عرض کیا: معاذ اللہ! (یا سبحان اللہ یا اسی طرح کا کوئی جملہ کہا)۔ انہوں نے فرمایا: میں نے رسول اللہ ﷺ کو یہ فرماتے ہوئے سنا ہے: ”جس نے علی کو برا بھلا کہا اس نے مجھے برا بھلا کہا۔“
یہ حدیث صحیح الاسناد ہے لیکن شیخین نے اسے روایت نہیں کیا، جبکہ اسے بکیر بن عثمان بجلی نے ابو اسحاق سے مزید الفاظ کے اضافے کے ساتھ بھی روایت کیا ہے:

ابو عبد اللہ جدلی سے روایت ہے کہ میں نے لڑکپن میں حج کیا اور مدینہ سے میرا گزر ہوا تو میں نے دیکھا کہ لوگ ایک ہی رخ پر جوق در جوق جا رہے ہیں، میں بھی ان کے پیچھے چل پڑا، وہ لوگ ام المومنین سیدہ ام سلمہ رضی اللہ عنہا کے پاس پہنچے، میں نے انہیں فرماتے سنا: ”اے شبث بن ربعی! (تو اس اجڈ اور بد تمیز شخص نے جواب دیا: اے ماں! میں حاضر ہوں) انہوں نے پوچھا: «يُسَبُّ رَسُولُ الله ﷺ فِي نَادِيكُمْ؟» اس نے کہا: ”یہ کیسے ممکن ہے؟“ انہوں نے فرمایا: ”کیا (تمہاری محفلوں میں) علی بن ابی طالب کو برا بھلا نہیں کہا جاتا؟“ اس نے کہا: ”ہم دنیاوی مفادات کی خاطر (ان کے خلاف) ایسی باتیں کہہ دیتے ہیں۔“ انہوں نے فرمایا: ”بلاشبہ میں نے رسول اللہ ﷺ کو یہ فرماتے ہوئے سنا ہے: ”جس نے علی کو گالی دی اس نے مجھے گالی دی، اور جس نے مجھے گالی دی اس نے اللہ تعالیٰ کو گالی دی۔““