المستدرك على الصحيحين

سیدنا عبد الاعلی بن عبد اللہ اپنے والد سے روایت کرتے ہیں کہ نبی کریم ﷺ نے احد کے شہداء کی قبروں کی زیارت کی اور فرمایا: «اللَّهُمَّ إِنَّ عَبْدَكَ وَنَبِيَّكَ يَشْهَدُ أَنَّ هَؤُلَاءِ شُهَدَاءُ، وَأَنَّهُ مَنْ زَارَهُمْ وَسَلَّمَ عَلَيْهِمْ إِلَى يَوْمِ الْقِيَامَةِ رَدُّوا عَلَيْهِ» ”اے اللہ! بے شک تیرا بندہ اور تیرا نبی گواہی دیتا ہے کہ یہ سب شہداء ہیں، اور جو کوئی بھی قیامت کے دن تک ان کی زیارت کرے گا اور انہیں سلام پیش کرے گا، وہ اسے سلام کا جواب دیں گے۔“

عطاف بیان کرتے ہیں کہ مجھے میری خالہ نے بتایا کہ انہوں نے شہداء کی قبروں کی زیارت کی، وہ کہتی ہیں کہ میرے ساتھ سوائے دو لڑکوں کے اور کوئی نہ تھا جو سواری کی حفاظت کر رہے تھے، میں نے شہداء کو سلام کیا تو میں نے ان کے سلام کا جواب سنا، انہوں نے کہا: اللہ کی قسم! ہم تمہیں ایسے ہی پہچانتے ہیں جیسے ہم ایک دوسرے کو پہچانتے ہیں، وہ کہتی ہیں کہ (یہ سن کر) مجھ پر کپکپی طاری ہو گئی، میں نے کہا: اے لڑکے! میری خچر قریب لاؤ، اور میں سوار ہو کر واپس آ گئی۔
یہ اسناد مدنی راویوں کے اعتبار سے صحیح ہے لیکن شیخین نے اسے روایت نہیں کیا۔

سیدہ عائشہ رضی اللہ عنہا سے روایت ہے کہ انہوں نے سیدنا عبداللہ بن زبیر رضی اللہ عنہ سے فرمایا: اے میرے بھانجے! اللہ کی قسم! تمہارے والد (زبیر) اور تمہارے نانا (ابوبکر) یقیناً ان لوگوں میں سے تھے جن کے بارے میں اللہ عزوجل نے ارشاد فرمایا ہے: ﴿الَّذِينَ اسْتَجَابُوا لِلَّهِ وَالرَّسُولِ مِنْ بَعْدِ مَا أَصَابَهُمُ الْقَرْحُ﴾ [آل عمران: 172] ”وہ لوگ جنہوں نے زخم کھانے کے بعد بھی اللہ اور رسول کے حکم کو مانا۔“
یہ حدیث صحیح ہے لیکن شیخین نے اسے روایت نہیں کیا۔