المستدرك على الصحيحين

سیدنا طلحہ بن عبید اللہ رضی اللہ عنہ سے روایت ہے، انہوں نے کہا: جب احد کا دن تھا تو میں نے یہ رجزیہ اشعار پڑھے: ”ہم غالب اور مالک (قبیلوں) کے محافظ ہیں، ہم اپنے مبارک رسول کا دفاع کرتے ہیں، ہم آج میدانِ کارزار میں ان کی طرف سے ایسی ضربیں لگاتے ہیں جیسی باڑے میں بیٹھے فربہ اونٹوں کی گردنوں پر ماری جاتی ہیں“، پھر جب نبی کریم ﷺ غزوہ احد سے واپس ہوئے تو آپ ﷺ نے حسان رضی اللہ عنہ سے فرمایا: ”طلحہ کے بارے میں کچھ کہو“، تو حسان رضی اللہ عنہ نے یہ اشعار کہے: ”طلحہ نے گھاٹی والے دن حضرت محمد ﷺ کی غم خواری کی، اس راستے پر جو ان پر تنگ اور دشوار گزار ہو گیا تھا، انہوں نے اپنے ہاتھوں سے نیزوں کو روکا جبکہ تلواروں کے سائے میں ان کی انگلیاں بے بس ہو کر شل ہو گئیں، اور وہ محمد ﷺ کے علاوہ تمام لوگوں کے پیشوا تھے، انہوں نے اسلام کی چکی کو قائم رکھا یہاں تک کہ وہ پوری طرح مستحکم ہو گئی“۔

سیدنا زبیر رضی اللہ عنہ سے روایت ہے، انہوں نے کہا: میں نے رسول اللہ ﷺ کو دیکھا جب آپ ﷺ ایک چٹان پر چڑھنے کا ارادہ فرما رہے تھے، اور رسول اللہ ﷺ نے (حفاظت کے لیے) دوہری زرہیں پہن رکھی تھیں، اس لیے آپ ﷺ اس پر نہ چڑھ سکے، تو سیدنا طلحہ بن عبید اللہ رضی اللہ عنہ آپ ﷺ کے نیچے بیٹھ گئے (تاکہ آپ ﷺ ان کا سہارا لے سکیں) اور رسول اللہ ﷺ بلند ہو کر چٹان پر برابر ہو گئے، تو رسول اللہ ﷺ نے فرمایا: ”طلحہ نے (جنت) واجب کر لی ہے“۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔

موسیٰ بن طلحہ سے روایت ہے کہ سیدنا طلحہ رضی اللہ عنہ (غزوہ احد سے) اس حال میں واپس آئے کہ ان کے جسم پر تلواروں کے زخموں، نیزوں کی انیسوں اور تیروں کے سینتیس یا پینتیس نشانات تھے، ان کی پیشانی پر بھی زخم کا نشان پڑ گیا تھا، ان کی کلمہ والی انگلی کٹ گئی تھی اور اس کے ساتھ والی انگلی شل (ناکارہ) ہو گئی تھی۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔