المستدرك على الصحيحين

سیدنا عبداللہ بن عمر رضی اللہ عنہما سے روایت ہے، انہوں نے کہا: جب رسول اللہ ﷺ مدینہ منورہ تشریف لائے تو آپ ﷺ نے اپنے صحابہ کے درمیان بھائی چارہ (مواخات) قائم کیا، تب سیدنا علی رضی اللہ عنہ اس حال میں حاضر ہوئے کہ ان کی آنکھوں سے آنسو جاری تھے، انہوں نے عرض کیا: یا رسول اللہ! آپ نے اپنے تمام اصحاب کے درمیان بھائی چارہ قائم فرما دیا لیکن میرے اور کسی کے درمیان بھائی چارہ قائم نہیں کیا، تو رسول اللہ ﷺ نے ارشاد فرمایا: ”اے علی! تم دنیا اور آخرت میں میرے بھائی ہو۔“ سالم بن ابی حفصہ نے بھی جمیع سے اس روایت کی متابعت کی ہے جس کے سیاق میں کچھ اضافہ (زیادتی) موجود ہے۔

سیدنا عبداللہ بن عمر رضی اللہ عنہما سے روایت ہے کہ رسول اللہ ﷺ نے اپنے اصحاب کے درمیان بھائی چارہ قائم کیا، پس آپ ﷺ نے سیدنا ابوبکر اور سیدنا عمر رضی اللہ عنہما کے درمیان، سیدنا طلحہ اور سیدنا زبیر رضی اللہ عنہما کے درمیان، اور سیدنا عثمان بن عفان اور سیدنا عبدالرحمن بن عوف رضی اللہ عنہما کے درمیان بھائی چارہ کروا دیا، تو سیدنا علی رضی اللہ عنہ نے عرض کیا: یا رسول اللہ! آپ نے تو اپنے صحابہ کے درمیان بھائی چارہ قائم کر دیا، تو میرا بھائی کون ہے؟ رسول اللہ ﷺ نے ارشاد فرمایا: ”اے علی! کیا تم اس بات پر راضی نہیں ہو کہ میں تمہارا بھائی بنوں؟“ ابن عمر رضی اللہ عنہما کہتے ہیں کہ سیدنا علی رضی اللہ عنہ نہایت قوی اور بہادر تھے، سیدنا علی رضی اللہ عنہ نے عرض کیا: کیوں نہیں یا رسول اللہ! تو رسول اللہ ﷺ نے ارشاد فرمایا: ”تم دنیا اور آخرت میں میرے بھائی ہو۔“