المستدرك على الصحيحين

سیدنا علی رضی اللہ عنہ سے روایت ہے کہ نبی کریم ﷺ نے جبرائیل علیہ السلام سے دریافت فرمایا: ”میرے ساتھ ہجرت کون کرے گا؟“ انہوں نے جواب دیا: ابو بکر صدیق رضی اللہ عنہ۔
یہ حدیث سند اور متن کے اعتبار سے صحیح غریب ہے لیکن شیخین نے اسے روایت نہیں کیا۔

سیدہ اسماء بنت ابی بکر رضی اللہ عنہما سے روایت ہے کہ جب رسول اللہ ﷺ مکہ سے مدینہ کی طرف روانہ ہوئے اور آپ ﷺ کے ساتھ سیدنا ابوبکر رضی اللہ عنہ بھی تھے، تو سیدنا ابوبکر رضی اللہ عنہ اپنا تمام مال، جو کہ پانچ یا چھ ہزار درہم تھے، اپنے ساتھ لے گئے۔ میرے دادا ابو قحافہ میرے پاس آئے، وہ اپنی بینائی کھو چکے تھے، انہوں نے کہا: ”اللہ کی قسم! اس شخص (ابوبکر) نے اپنی جان کے ساتھ ساتھ اپنے مال کے معاملے میں بھی تمہیں صدمے میں ڈال دیا ہے۔“ میں نے کہا: ”ابا جان! ہرگز نہیں، وہ تو ہمارے لیے بہت سی خیر (مال) چھوڑ گئے ہیں۔“ چنانچہ میں نے چند پتھر پکڑے اور انہیں گھر کے اس روشن دان (طاق) میں رکھ دیا جہاں سیدنا ابوبکر رضی اللہ عنہ اپنا مال رکھا کرتے تھے، پھر میں نے ان پتھروں کو ایک کپڑے سے ڈھانپ دیا۔ پھر میں آئی اور ان کا ہاتھ پکڑ کر اسے کپڑے پر رکھا، تو انہوں نے کہا: ”اگر وہ یہ (مال) چھوڑ گیا ہے تو پھر ٹھیک ہے۔“ سیدہ اسماء رضی اللہ عنہا فرماتی ہیں: اللہ کی قسم! انہوں نے ہمارے لیے تھوڑا یا زیادہ کچھ بھی نہیں چھوڑا تھا۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔