المستدرك على الصحيحين

سیدہ عائشہ رضی اللہ عنہا سے روایت ہے کہ سورہ ﴿عَبَسَ وَتَوَلَّى﴾ نابینا صحابی ابن ام مکتوم رضی اللہ عنہ کے متعلق نازل ہوئی، وہ رسول اللہ ﷺ کی خدمت میں حاضر ہوئے اور کہنے لگے: (اے اللہ کے رسول!) میری رہنمائی فرمائیے، اس وقت رسول اللہ ﷺ کے پاس مشرکین کے بڑے سردار بیٹھے ہوئے تھے، چنانچہ رسول اللہ ﷺ ان (نابینا صحابی) سے اعراض فرما کر ان سرداروں کی طرف متوجہ ہو گئے اور ان سے دریافت کرنے لگے: ”کیا جو میں کہہ رہا ہوں اس میں تمہیں کوئی حرج نظر آتا ہے؟“ وہ کہتے: نہیں، پس اسی موقع پر ﴿عَبَسَ وَتَوَلَّى﴾ [سورة عبس: 1] ”وہ ماتھے پر بل لائے اور منہ موڑ لیا“ نازل ہوئی۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا، کیونکہ راویوں کی ایک جماعت نے اسے ہشام بن عروہ سے مرسل روایت کیا ہے۔

سیدنا انس بن مالک رضی اللہ عنہ سے مروی ہے کہ انہوں نے سیدنا عمر بن خطاب رضی اللہ عنہ کو یہ آیات پڑھتے سنا: ﴿فَأَنْبَتْنَا فِيهَا حَبًّا (27) وَعَنِبًا وَقَضْبًا (28) وَزَيْتُونًا وَنَخْلًا (29) وَحَدَائِقَ غُلْبًا (30) وَفَاكِهَةً وَأَبًّا﴾ [سورة عبس: 27-31] (پھر عمر فاروق رضی اللہ عنہ نے) فرمایا: یہ سب تو ہم نے جان لیا، مگر «اَبّ» سے کیا مراد ہے؟ پھر انہوں نے اپنے ہاتھ میں موجود لاٹھی کو حرکت دی اور فرمایا: اللہ کی قسم! یہ تو (معانی کی گہرائی میں جانے کا) تکلف ہے، تم اس کتاب میں سے اس بات کی پیروی کرو جو تم پر واضح ہو چکی ہے۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔

ام المومنین سیدہ سودہ رضی اللہ عنہا سے روایت ہے کہ رسول اللہ ﷺ نے فرمایا: ”لوگ (قیامت کے دن) ننگے پاؤں، ننگے بدن اور بغیر ختنہ کیے اٹھائے جائیں گے، پسینہ ان کے منہ تک لگام کی طرح پہنچ جائے گا اور کانوں کی لو تک پہنچ جائے گا“، سیدہ سودہ رضی اللہ عنہا کہتی ہیں کہ میں نے عرض کی: اے اللہ کے رسول! ہائے افسوس، کیا ہم ایک دوسرے کی طرف دیکھیں گے؟ آپ ﷺ نے فرمایا: ”لوگ اس وقت اس (دیکھنے) سے بے نیاز اور (اپنی فکر میں) مشغول ہوں گے“، پھر رسول اللہ ﷺ نے یہ آیات تلاوت فرمائیں: ﴿يَوْمَ يَفِرُّ الْمَرْءُ مِنْ أَخِيهِ (34) وَأُمِّهِ وَأَبِيهِ (35) وَصَاحِبَتِهِ وَبَنِيهِ (36) لِكُلِّ امْرِئٍ مِنْهُمْ يَوْمَئِذٍ شَأْنٌ يُغْنِيهِ﴾ [سورة عبس: 34-37] ”جس دن آدمی اپنے بھائی سے بھاگے گا، اور اپنی ماں اور اپنے باپ سے، اور اپنی بیوی اور اپنے بیٹوں سے، اس دن ان میں سے ہر شخص کی ایسی حالت ہوگی جو اسے (دوسروں سے) بے پروا کر دے گی۔“
یہ حدیث امام مسلم کی شرط پر صحیح ہے لیکن انہوں نے اس لفظ کے ساتھ اسے روایت نہیں کیا، بلکہ شیخین نے حاتم بن ابی صغیرہ کی روایت سے عائشہ رضی اللہ عنہا سے اسے مختصراً روایت کرنے پر اتفاق کیا ہے۔

سیدنا ابی بن کعب رضی اللہ عنہ سے اللہ تعالیٰ کے فرمان ﴿وَحُمِلَتِ الْأَرْضُ وَالْجِبَالُ فَدُكَّتَا دَكَّةً وَاحِدَةً﴾ [سورة الحاقة: 14] کے متعلق روایت ہے، انہوں نے فرمایا: وہ دونوں (زمین اور پہاڑ) ریزہ ریزہ ہو کر کافروں کے چہروں پر غبار بن کر پڑیں گے نہ کہ مومنوں کے چہروں پر، اور یہی اللہ تعالیٰ کا فرمان ہے: ﴿وَوُجُوهٌ يَوْمَئِذٍ عَلَيْہا غَبَرَةٌ (40) تَرْهَقُهَا قَتَرَةٌ﴾ [سورة عبس: 40-41] ”اور بہت سے چہروں پر اس دن غبار ہوگا، ان پر سیاہی چھائی ہوگی۔“
یہ حدیث صحیح الاسناد ہے لیکن شیخین نے اسے روایت نہیں کیا۔