المستدرك على الصحيحين

سیدنا ابودرداء رضی اللہ عنہ سے روایت ہے کہ نبی کریم ﷺ نے فرمایا: ”سیدنا داؤد علیہ السلام یہ دعا کیا کرتے تھے: «اللَّهُمَّ إِنِّي أَسْأَلُكَ حُبَّكَ، وَحُبَّ مَنْ يُحِبُّكَ، وَالْعَمَلَ الَّذِي يُبَلِّغُنِي حُبَّكَ، اللَّهُمَّ اجْعَلْ حُبَّكَ أَحَبَّ إِلَيَّ مِنْ نَفْسِي وَأَهْلِي وَمِنَ الْمَاءِ الْبَارِدِ» ”اے اللہ! میں تجھ سے تیری محبت کا، اس شخص کی محبت کا جو تجھ سے محبت کرتا ہے اور ایسے عمل کا سوال کرتا ہوں جو مجھے تیری محبت تک پہنچا دے، اے میرے رب! اپنی محبت کو میرے لیے میری جان، میرے اہل و عیال اور ٹھنڈے پانی سے بھی زیادہ محبوب بنا دے۔“ اور جب نبی کریم ﷺ سیدنا داؤد علیہ السلام کا ذکر فرماتے یا ان کے بارے میں کوئی بات بتاتے تو فرماتے: ”وہ تمام انسانوں میں سب سے زیادہ عبادت گزار تھے۔“
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا عبداللہ بن عباس رضی اللہ عنہما سے روایت ہے، انہوں نے فرمایا: سیدنا داؤد علیہ السلام کا ہفتے کے دن اچانک انتقال ہوا، وہ ہفتے کے دن (عبادت کے لیے) وقف رہتے تھے، پس پرندوں نے ان پر سایہ کر کے ان پر اعتکاف کیا۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔

سیدنا عبداللہ بن عباس رضی اللہ عنہما سے اللہ تعالیٰ کے فرمان ﴿وَأَلْقَيْنَا عَلَى كُرْسِيِّهِ جَسَدًا﴾ [سورة ص: 34] کے متعلق روایت ہے، انہوں نے کہا: اس سے مراد وہ شیطان ہے جو چالیس دن تک ان کی کرسی پر بیٹھ کر لوگوں کے درمیان فیصلے کرتا رہا، سیدنا سلیمان علیہ السلام کی ایک لونڈی تھی جس کا نام ”جرادہ“ تھا، اس کے گھر والوں اور اس کی قوم کے درمیان کوئی جھگڑا تھا، سیدنا سلیمان علیہ السلام نے ان کے درمیان برحق فیصلہ تو کر دیا لیکن ان کے دل میں یہ خواہش پیدا ہوئی کہ حق ان کے گھر والوں کے حق میں نکل آئے، تب اللہ تعالیٰ نے ان کی طرف وحی فرمائی کہ عنقریب آپ ایک آزمائش میں مبتلا ہوں گے، اور وہ نہیں جانتے تھے کہ یہ آزمائش آسمان سے آئے گی یا زمین سے۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔