المستدرك على الصحيحين

سیدنا عمر رضی اللہ عنہ سے مروی ہے کہ نبی کریم ﷺ نے فرمایا: ”جو شخص یہ پسند کرے کہ وہ قرآن کو اسی طرح ترو تازہ پڑھے جیسا کہ وہ نازل کیا گیا ہے، تو اسے چاہیے کہ وہ ابنِ امِ عبد (عبد اللہ بن مسعود) کی قرات کے مطابق پڑھے۔“ علقمہ کی سیدنا عمر رضی اللہ عنہ سے یہ روایت شیخین کی شرط پر صحیح ہے لیکن انہوں نے اسے روایت نہیں کیا، میرا گمان یہ ہے کہ ان کے نزدیک علقمہ بن قیس کا سیدنا عمر سے سماع ثابت نہیں ہے، واللہ اعلم۔ اور اس کی ایک مفصل شاہد روایت سیدنا عمار بن یاسر رضی اللہ عنہ سے بھی مروی ہے۔

سیدنا عمار بن یاسر رضی اللہ عنہ سے روایت ہے کہ رسول اللہ ﷺ سیدنا عبد اللہ بن مسعود رضی اللہ عنہ کے پاس سے گزرے جبکہ وہ حرف بحرف (قرآن) پڑھ رہے تھے، تو آپ ﷺ نے فرمایا: ”جسے یہ بات خوش کرے کہ وہ قرآن ویسا ہی پڑھے جیسا نازل ہوا ہے، تو اسے چاہیے کہ وہ ابنِ مسعود کی قرات کے مطابق پڑھے۔“

ابو میسرہ عمرو بن شرحبیل رحمہ اللہ سے روایت ہے، انہوں نے کہا کہ ایک شخص میرے پاس آیا جبکہ میں نماز پڑھ رہا تھا اور اس نے کہا: تمہاری ماں تمہیں روئے! کیا میں تمہیں دیکھ نہیں رہا کہ تم نماز پڑھ رہے ہو حالانکہ کتاب اللہ کے بارے میں حکم دیا گیا ہے کہ اس کے ٹکڑے ٹکڑے کر دیے جائیں، وہ بیان کرتے ہیں کہ میں نے اپنی نماز مختصر کی اور میں (نماز کے بعد) کہیں رکا نہیں، میں گھر میں داخل ہوا اور سیدھا اوپر چڑھ گیا، وہاں میں نے دیکھا کہ ابو موسیٰ اشعری، حذیفہ اور ابن مسعود رضی اللہ عنہم ایک دوسرے سے تکرار کر رہے تھے، حذیفہ رضی اللہ عنہ ابن مسعود سے کہہ رہے تھے: آپ اپنا یہ مصحف ان کے حوالے کر دیں، ابن مسعود نے کہا: اللہ کی قسم! میں اسے ہرگز حوالے نہیں کروں گا، رسول اللہ ﷺ نے مجھے ستر سے زائد سورتیں پڑھائی ہیں، پھر میں اسے ان کے حوالے کر دوں؟ اللہ کی قسم! میں اسے ان کے حوالے نہیں کروں گا۔
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا عبد اللہ بن مسعود رضی اللہ عنہ سے روایت ہے، انہوں نے کہا: میں نے خود رسول اللہ ﷺ کے دہن مبارک سے ستر سورتیں پڑھی ہیں جبکہ (ان دنوں) زید بن ثابت دو مینڈھیوں (چوٹیوں) والے لڑکے تھے اور بچوں کے ساتھ کھیلا کرتے تھے۔
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا عبد اللہ بن مسعود رضی اللہ عنہ سے روایت ہے، انہوں نے کہا: رسول اللہ ﷺ نے مجھے ستر سورتیں پڑھائی ہیں جنہیں میں نے زید بن ثابت کے اسلام لانے سے پہلے ہی پختہ کر لیا تھا۔