المستدرك على الصحيحين

سیدنا بریدہ رضی اللہ عنہ سے روایت ہے کہ رسول اللہ ﷺ نے فرمایا: ”جس نے قرآن پڑھا، اسے سیکھا اور اس پر عمل کیا، اسے قیامت کے دن نور کا ایک تاج پہنایا جائے گا جس کی چمک سورج کی طرح ہوگی، اور اس کے والدین کو دو ایسے لباس (حلے) پہنائے جائیں گے جن کے برابر دنیا کی کوئی چیز نہیں ہو سکتی، وہ پوچھیں گے: ہمیں یہ کس صلے میں پہنائے گئے ہیں؟ تو کہا جائے گا: تمہارے بچے کے قرآن حاصل کرنے کی وجہ سے۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔

سیدنا معقل بن یسار رضی اللہ عنہ سے روایت ہے کہ رسول اللہ ﷺ نے فرمایا: ”قرآن پر عمل کرو، اس کے حلال کو حلال اور حرام کو حرام جانو، اس کی پیروی کرو اور اس کی کسی چیز کا انکار نہ کرو، اور اس میں سے جو باتیں تم پر مشتبہ ہو جائیں انہیں اللہ اور میرے بعد اولو الامر کی طرف لوٹا دو تاکہ وہ تمہیں ان کی حقیقت سے باخبر کریں، اور تورات، انجیل، زبور اور ان تمام کتابوں پر ایمان لاؤ جو انبیاء کو ان کے رب کی طرف سے دی گئیں، اور تمہارے لیے قرآن اور اس کا بیان کافی ہونا چاہیے، کیونکہ وہ ایسی شفاعت کرنے والا ہے جس کی شفاعت قبول کی جائے گی اور ایسا سچا جھگڑا کرنے والا (وکیل) ہے جس کی تصدیق کی جائے گی، خبردار! ہر آیت کے لیے قیامت کے دن ایک نور ہوگا، اور مجھے ذکرِ اول (لوحِ محفوظ) سے سورہ بقرہ عطا کی گئی، اور طہ، طواسین اور حوامیم موسیٰ علیہ السلام کی الواح سے دی گئیں، اور مجھے فاتحہ الکتاب عرش کے نیچے سے عطا کی گئی۔“
یہ حدیث صحیح الاسناد ہے لیکن شیخین نے اسے روایت نہیں کیا۔