المستدرك على الصحيحين

سیدنا نعمان بن بشیر رضی اللہ عنہ سے روایت ہے کہ نبی کریم ﷺ نے فرمایا: ”بے شک اللہ عزوجل نے آسمانوں اور زمین کی تخلیق سے دو ہزار سال پہلے ایک کتاب لکھی اور اس میں سے دو ایسی آیات نازل کیں جن پر سورہ بقرہ کو ختم فرمایا، وہ (آیات) جس گھر میں تین راتیں پڑھی جائیں شیطان اس کے قریب نہیں آتا۔“
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا ابوذر رضی اللہ عنہ سے روایت ہے کہ رسول اللہ ﷺ نے فرمایا: ”بے شک اللہ تعالیٰ نے سورہ بقرہ کا اختتام دو ایسی آیات پر فرمایا ہے جو اس نے مجھے اپنے اس خزانے سے عطا فرمائی ہیں جو عرش کے نیچے ہے، پس تم انہیں خود بھی سیکھو اور اپنی عورتوں اور بچوں کو بھی سکھاؤ، کیونکہ یہ (تلاوت) نماز بھی ہے، قرآن بھی ہے اور دعا بھی ہے۔“
یہ حدیث امام بخاری کی شرط پر صحیح ہے لیکن شیخین نے اسے روایت نہیں کیا، اور عبداللہ بن وہب نے اسے معاویہ بن صالح سے مرسلاً روایت کیا ہے۔

سیدنا جبیر بن نفیر رضی اللہ عنہ سے مرسلاً مروی ہے کہ رسول اللہ ﷺ نے اسی کے مثل فرمایا۔
امام مسلم نے سیدنا حذیفہ رضی اللہ عنہ سے روایت نقل کی ہے کہ رسول اللہ ﷺ نے فرمایا: ”مجھے سورہ بقرہ کی آخری آیات عرش کے نیچے موجود ایک خزانے سے عطا کی گئی ہیں۔“