المستدرك على الصحيحين

سیدنا معاذ بن جبل رضی اللہ عنہ سے روایت ہے (ابو اسود کہتے ہیں کہ) میں نے ان سے کہا کہ جب آپ نے شیطان کو پکڑا تھا تو اس کا قصہ سنائیں؟ انہوں نے کہا: رسول اللہ ﷺ نے مجھے مسلمانوں کے صدقے کے مال (کھجوروں) پر مقرر فرمایا، میں نے کھجوریں ایک کمرے میں رکھیں تو ان میں کمی محسوس ہوئی، میں نے رسول اللہ ﷺ کو بتایا تو آپ ﷺ نے فرمایا: ”یہ شیطان ہے جو اسے لے رہا ہے“، معاذ کہتے ہیں: میں کمرے میں گیا اور دروازہ بند کر لیا، پھر ایک تاریکی چھا گئی اور وہ ہاتھی کی صورت میں ظاہر ہوا، پھر دوسری شکل بدلی اور دروازے کی درز سے داخل ہوا اور کھجوریں کھانے لگا، میں اس پر جھپٹا اور اسے جکڑ لیا، میں نے کہا: اے اللہ کے دشمن! اس نے کہا: مجھے چھوڑ دو، میں بوڑھا ہوں، میرا بڑا خاندان ہے، میں فقیر ہوں اور میں نصیبین کے جنات میں سے ہوں، آپ کے صاحب (نبی ﷺ) کی بعثت سے پہلے یہ بستی ہماری تھی، جب وہ مبعوث ہوئے تو ہمیں نکال دیا گیا، مجھے چھوڑ دو میں اب نہیں آؤں گا، میں نے اسے چھوڑ دیا، جبرائیل علیہ السلام آئے اور رسول اللہ ﷺ کو خبر دی، آپ ﷺ نے صبح کی نماز پڑھائی اور منادی نے پکارا: معاذ بن جبل کہاں ہیں؟ میں حاضر ہوا تو آپ ﷺ نے فرمایا: ”تمہارے قیدی نے کیا کیا اے معاذ؟“ میں نے بتایا تو آپ ﷺ نے فرمایا: ”وہ دوبارہ آئے گا تم بھی دوبارہ (پکڑنے کے لیے) تیار رہو“، میں کمرے میں گیا اور دروازہ بند کر لیا، وہ پھر درز سے داخل ہوا اور کھجوریں کھانے لگا، میں نے پھر اسے پکڑ لیا، اس نے کہا: مجھے چھوڑ دیں میں دوبارہ نہیں آؤں گا، میں نے کہا: اے اللہ کے دشمن! کیا تو نے پہلے نہیں کہا تھا کہ نہیں آؤں گا؟ اس نے کہا: (اس بار پکا وعدہ ہے کہ) میں نہیں آؤں گا، اور اس کی نشانی یہ ہے کہ تم میں سے جو کوئی سورہ بقرہ کی آخری آیات پڑھ لے گا تو اس رات ہم میں سے کوئی اس کے گھر میں داخل نہیں ہو سکے گا۔
یہ حدیث صحیح الاسناد ہے لیکن شیخین نے اسے روایت نہیں کیا، اور عبدالمنعم بن خالد ثقہ مروزی ہیں جن کی حدیث جمع کی جاتی ہے، اور زید بن حباب نے بھی ان سے یہی حدیث روایت کی ہے۔

سیدنا معاذ بن جبل رضی اللہ عنہ سے شیطان والا قصہ مروی ہے (جیسا کہ پہلے نمبر 2093 میں گزرا ہے)۔