المستدرك على الصحيحين

سیدنا ابی بن کعب رضی اللہ عنہ سے روایت ہے کہ ان کے پاس کھجوروں کا ایک کھلیان تھا جس میں سے کھجوریں کم ہو جاتی تھیں، انہوں نے ایک رات پہرہ دیا تو کیا دیکھتے ہیں کہ ایک نوجوان لڑکے جتنا جثہ نظر آیا، انہوں نے اسے سلام کیا، اس نے سلام کا جواب دیا، انہوں نے پوچھا: تم جن ہو یا انسان؟ اس نے کہا: میں جن ہوں، انہوں نے کہا: اپنا ہاتھ دکھاؤ، اس نے دکھایا تو وہ کتے کے ہاتھ اور کتے کے بالوں جیسا تھا، انہوں نے کہا: جنوں کی پیدائش ایسی ہی ہوتی ہے، پھر اس نے کہا: تمام جن جانتے ہیں کہ ان میں مجھ سے زیادہ طاقتور کوئی نہیں، انہوں نے پوچھا: تمہیں یہاں کون لایا؟ اس نے کہا: ہمیں معلوم ہوا ہے کہ آپ صدقہ پسند کرتے ہیں تو ہم آپ کے کھانے میں سے کچھ لینے آئے ہیں، انہوں نے پوچھا: ہمیں تم سے کون سی چیز پناہ دے گی؟ اس نے کہا: کیا آپ سورہ بقرہ کی آیت الکرسی ﴿اللَّهُ لَا إِلَهَ إِلَّا هُوَ الْحَيُّ الْقَيُّومُ﴾ [سورة البقرة: 255] پڑھتے ہیں؟ انہوں نے کہا: ہاں، اس نے کہا: اگر آپ اسے صبح کے وقت پڑھیں گے تو شام تک ہم سے محفوظ رہیں گے، اور اگر شام کو پڑھیں گے تو صبح تک محفوظ رہیں گے۔ ابی رضی اللہ عنہ کہتے ہیں: میں صبح رسول اللہ ﷺ کی خدمت میں حاضر ہوا اور آپ کو اس کی خبر دی، تو آپ ﷺ نے فرمایا: ”اس خبیث نے سچ کہا۔“
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا عقبہ بن عامر رضی اللہ عنہ سے روایت ہے کہ رسول اللہ ﷺ نے فرمایا: ”سورہ بقرہ کی آخری دو آیات پڑھا کرو، کیونکہ یہ دونوں مجھے عرش کے نیچے سے عطا کی گئی ہیں۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔