المستدرك على الصحيحين

سیدنا عبداللہ بن مسعود رضی اللہ عنہ سے روایت ہے کہ رسول اللہ ﷺ میرے پاس سے گزرے جبکہ میں نماز پڑھ رہا تھا، آپ ﷺ نے فرمایا: ”مانگو، تمہیں دیا جائے گا اے ابن ام عبد“، سیدنا عمر رضی اللہ عنہ کہتے ہیں کہ میں اور ابوبکر رضی اللہ عنہ ان کی طرف لپکے لیکن ابوبکر مجھ سے سبقت لے گئے۔ ابن مسعود رضی اللہ عنہ نے کہا: میری اس دعا میں سے جسے میں کبھی نہیں چھوڑتا یہ ہے: «اللَّهُمَّ إِنِّي أَسْأَلُكَ نَعِيمًا لَا يَبِيدُ، وَقُرَّةَ عَيْنٍ لَا تَنْفَدُ، وَمُرَافَقَةَ النَّبِيِّ ﷺ فِي أَعْلَى جَنَّةِ الْخُلْدِ» ”اے اللہ! میں تجھ سے ایسی نعمت کا سوال کرتا ہوں جو کبھی ختم نہ ہو، اور ایسی آنکھوں کی ٹھنڈک جو کبھی منقطع نہ ہو، اور جنت الخلد کے بلند ترین درجات میں نبی ﷺ کی رفاقت کا طالب ہوں۔“
یہ حدیث صحیح الاسناد ہے بشرطیکہ یہ مرسل نہ ہو، لیکن شیخین نے اسے روایت نہیں کیا۔

سیدہ ام سلمہ رضی اللہ عنہا سے روایت ہے کہ نبی کریم ﷺ یہ کلمات بطور دعا کہا کرتے تھے: «اللَّهُمَّ أَنْتَ الْأَوَّلُ لَا شَيْءَ قَبْلَكَ، وَأَنْتَ الْآخِرُ فَلَا شَيْءَ بَعْدَكَ، أَعُوذُ بِكَ مِنْ شَرِّ دَابَّةٍ نَاصِيَتُهَا بِيَدِكَ، وَأَعُوذُ بِكَ مِنَ الْإِثْمِ وَالْكَسَلِ، وَمِنْ عَذَابِ الْقَبْرِ، وَمِنْ فِتْنَةِ الْغِنَى، وَمِنْ فِتْنَةِ الْفَقْرِ، وَأَعُوذُ بِكَ مِنَ الْمَأْثَمِ وَالْمَغْرَمِ، اللَّهُمَّ نَقِّ قَلْبِي مِنَ الْخَطَايَا كَمَا نَقَّيْتَ الثَّوْبَ الْأَبْيَضَ مِنَ الدَّنَسِ، اللَّهُمَّ بَعِّدْ بَيْنِي وَبَيْنَ خَطِيئَتِي كَمَا بَعَّدْتَ بَيْنَ الْمَشْرِقِ وَالْمَغْرِبِ» ”اے اللہ! تو ہی اول ہے تجھ سے پہلے کچھ نہیں، تو ہی آخر ہے تیرے بعد کچھ نہیں، میں ہر اس جاندار کے شر سے تیری پناہ مانگتا ہوں جس کی پیشانی تیرے قبضے میں ہے، اور میں گناہ، سستی، قبر کے عذاب، مالداری کے فتنے اور فقر کے فتنے سے تیری پناہ مانگتا ہوں، اور میں گناہ کے کاموں اور تاوان (قرض) سے تیری پناہ مانگتا ہوں، اے اللہ! میرے دل کو خطاؤں سے ایسے پاک کر دے جیسے تو نے سفید کپڑے کو میل کچیل سے پاک کیا، اے اللہ! میرے اور میری خطاؤں کے درمیان ایسی دوری پیدا کر دے جیسی تو نے مشرق اور مغرب کے درمیان رکھی ہے۔“
یہ حدیث صحیح الاسناد ہے لیکن شیخین نے اسے روایت نہیں کیا۔