المستدرك على الصحيحين

سیدنا ابوہریرہ رضی اللہ عنہ سے روایت ہے کہ رسول اللہ ﷺ نے سیدنا سلمان خیر (فارسی) رضی اللہ عنہ کو وصیت کرتے ہوئے فرمایا: ”اے سلمان! رسول اللہ چاہتے ہیں کہ تمہیں ایسے کلمات عطا کریں جن کے ذریعے تم رحمٰن سے سوال کرو، اس کی طرف رغبت کرو اور دن رات ان کے ذریعے دعا مانگو، کہو: «اللَّهُمَّ إِنِّي أَسْأَلُكَ صِحَّةً فِي إِيمَانٍ، وَإِيمَانًا فِي حُسْنِ خُلُقٍ، وَنَجَاحًا يتبَعُهُ فَلَاحٌ، وَرَحْمَةً مِنْكَ وَعَافِيَةً، وَمَغْفِرَةً مِنْكَ وَرِضْوَانًا» ”اے اللہ! میں تجھ سے ایمان کے ساتھ صحت و سلامتی کا، اچھے اخلاق کے ساتھ کامل ایمان کا، ایسی کامیابی کا جس کے پیچھے فلاح و کامرانی ہو، اور تیری طرف سے رحمت، عافیت، بخشش اور تیری رضا کا سوال کرتا ہوں۔““
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا سلمان فارسی رضی اللہ عنہ سے روایت ہے کہ رسول اللہ ﷺ نے فرمایا: ”جس نے یہ کہا: «اللَّهُمَّ إِنِّي أُشْهِدُكَ وَأُشْهِدُ مَلَائِكَتَكَ وَحَمَلَةَ عَرْشِكَ، وَأُشْهِدُ مَنْ فِي السَّمَاوَاتِ وَأُشْهِدُ مَنْ فِي الْأَرْضِ، أَنَّكَ أَنْتَ اللهُ لَا إِلَهَ إِلَّا أَنْتَ، وَحْدَكَ لَا شَرِيكَ لَكَ، وَأَشْهَدُ أَنَّ مُحَمَّدًا عَبْدُكَ وَرَسُولُكَ» ”اے اللہ! میں تجھے گواہ بناتا ہوں اور تیرے فرشتوں، تیرے عرش کو اٹھانے والوں، اور جو کوئی آسمانوں اور زمین میں ہے ان سب کو گواہ بناتا ہوں کہ یقیناً تو ہی اللہ ہے، تیرے سوا کوئی معبود نہیں، تو اکیلا ہے تیرا کوئی شریک نہیں، اور میں گواہی دیتا ہوں کہ محمد (ﷺ) تیرے بندے اور رسول ہیں“، جس نے اسے ایک بار کہا اللہ اس کا ایک تہائی حصہ آگ سے آزاد کر دیتا ہے، جس نے دو بار کہا اللہ اس کے دو تہائی حصے کو آگ سے آزاد کر دیتا ہے، اور جس نے تین بار کہا اسے مکمل طور پر آگ سے آزاد کر دیا جاتا ہے۔“
یہ حدیث صحیح الاسناد ہے لیکن شیخین نے اسے روایت نہیں کیا۔