المستدرك على الصحيحين

سیدنا انس بن مالک رضی اللہ عنہ سے روایت ہے کہ ہم نبی کریم ﷺ کے ساتھ ایک حلقے میں موجود تھے اور ایک شخص کھڑا نماز پڑھ رہا تھا، جب اس نے رکوع اور سجدہ کیا، تشہد مکمل کیا اور دعا مانگی تو اس نے اپنی دعا میں یہ کہا: «اللّٰهُمَّ إِنِّي أَسْأَلُكَ بِأَنَّ لَكَ الْحَمْدَ، لَا إِلٰهَ إِلَّا أَنْتَ، بَدِيْعُ السَّمَاوَاتِ وَالْأَرْضِ، يَا ذَا الْجَلَالِ وَالْإِكْرَامِ، يَا حَيُّ يَا قَيُّوْمُ» ”اے اللہ! میں تجھ سے سوال کرتا ہوں اس وسیلے سے کہ تمام تعریفیں تیرے ہی لیے ہیں، تیرے سوا کوئی معبود نہیں، تو آسمانوں اور زمین کا بغیر نمونے کے پیدا کرنے والا ہے، اے بزرگی اور انعام و اکرام والے! اے زندہ جاوید اور سب کو قائم رکھنے والے!“ تو نبی کریم ﷺ نے فرمایا: ”اس نے اللہ کے اس اسمِ اعظم کے ذریعے دعا مانگی ہے کہ جب اس کے ساتھ پکارا جائے تو وہ جواب دیتا ہے اور جب کچھ مانگا جائے تو عطا فرماتا ہے۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔

سیدنا انس بن مالک رضی اللہ عنہ سے مروی ہے کہ رسول اللہ ﷺ نے ایک شخص کو یہ کہتے ہوئے سنا: «اللّٰهُمَّ إِنِّي أَسْأَلُكَ بِأَنَّ لَكَ الْحَمْدَ، لَا إِلٰهَ إِلَّا أَنْتَ، الْمَنَّانُ، بَدِيْعُ السَّمَاوَاتِ وَالْأَرْضِ، ذُو الْجَلَالِ وَالْإِكْرَامِ، أَسْأَلُكَ الْجَنَّةَ، وَأَعُوْذُ بِكَ مِنَ النَّارِ» ”اے اللہ! میں تجھ سے سوال کرتا ہوں اس وسیلے سے کہ تمام تعریفیں تیرے ہی لیے ہیں، تیرے سوا کوئی معبود نہیں، تو بہت زیادہ احسان کرنے والا اور آسمانوں و زمین کا خالق ہے، اے جلال اور اکرام والے! میں تجھ سے جنت کا سوال کرتا ہوں اور جہنم کی آگ سے تیری پناہ مانگتا ہوں“، تو نبی ﷺ نے فرمایا: ”اس نے اللہ سے اس کے اس نام کے ذریعے دعا مانگی ہے کہ جس کے وسیلے سے پکارا جائے تو وہ قبول فرماتا ہے اور مانگا جائے تو عطا کرتا ہے۔“

سیدنا عبداللہ بن بریدہ الاسلمی اپنے والد سے روایت کرتے ہیں کہ نبی کریم ﷺ نے ایک شخص کو یہ کہتے ہوئے سنا: «اللّٰهُمَّ إِنِّي أَسْأَلُكَ بِأَنَّكَ أَنْتَ اللّٰهُ لَا إِلٰهَ إِلَّا أَنْتَ، الْأَحَدُ الصَّمَدُ، الَّذِي لَمْ يَلِدْ وَلَمْ يُوْلَدْ، وَلَمْ يَكُنْ لَهُ كُفُوًا أَحَدٌ» ”اے اللہ! میں تجھ سے سوال کرتا ہوں کہ بے شک تو ہی اللہ ہے، تیرے سوا کوئی معبود نہیں، تو تنہا ہے، سب سے بے نیاز ہے، جس کی کوئی اولاد نہیں اور نہ وہ کسی کی اولاد ہے اور نہ ہی اس کا کوئی ہمسر ہے“، تو نبی ﷺ نے فرمایا: ”یقیناً تو نے اللہ سے اس کے اسمِ اعظم کے وسیلے سے سوال کیا ہے کہ جب اس کے ذریعے مانگا جائے تو وہ عطا کرتا ہے اور پکارا جائے تو جواب دیتا ہے۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔

سیدنا بریدہ رضی اللہ عنہ سے روایت ہے کہ نبی ﷺ نے ایک شخص کو یہ کہتے ہوئے سنا: «اللّٰهُمَّ إِنِّي أَسْأَلُكَ بِأَنَّكَ أَحَدٌ صَمَدٌ، لَمْ يَلِدْ وَلَمْ يُوْلَدْ، وَلَمْ يَكُنْ لَكَ كُفُوًا أَحَدٌ» ”اے اللہ! میں تجھ سے سوال کرتا ہوں اس وسیلے سے کہ تو ایک ہے، بے نیاز ہے، نہ تو نے کسی کو جنا اور نہ تو جنا گیا، اور کوئی تیرا برابری کرنے والا نہیں ہے“، تو آپ ﷺ نے فرمایا: ”یقیناً اس نے اللہ سے اس کے اسمِ اعظم—یا فرمایا اسمِ اکبر—کے ذریعے سوال کیا ہے کہ جس کے ساتھ پکارنے پر وہ قبول فرماتا ہے اور مانگنے پر عطا کرتا ہے۔“
یہ گزشتہ حدیث کا ایسا شاہد ہے جس کی سند امام مسلم کی شرط پر صحیح ہے۔