المستدرك على الصحيحين

سیدنا طلحہ بن عبید اللہ رضی اللہ عنہ سے روایت ہے کہ میں نے رسول اللہ ﷺ سے ”سبحان اللہ“ کی تفسیر کے متعلق پوچھا تو آپ ﷺ نے فرمایا: ”اس کا مطلب اللہ تعالیٰ کو ہر قسم کے عیب اور برائی سے پاک قرار دینا ہے۔“
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا ابن مسعود رضی اللہ عنہ سے روایت ہے کہ نبی کریم ﷺ کثرت سے یہ دعا کیا کرتے تھے: «سُبْحَانَكَ اللَّهُمَّ وَبِحَمْدِكَ، اللَّهُمَّ اغْفِرْ لِي» ”اے اللہ! تو اپنی حمد کے ساتھ پاک ہے، اے اللہ! مجھے بخش دے“، پھر جب یہ سورت نازل ہوئی: ﴿إِذَا جَاءَ نَصْرُ اللَّهِ وَالْفَتْحُ﴾ ”جب اللہ کی مدد اور فتح آ جائے“ [سورة النصر: 1] تو آپ ﷺ نے یہ کہنا شروع کیا: ”اے اللہ! تو پاک ہے، اے اللہ! مجھے معاف فرما دے، بے شک تو ہی توبہ قبول کرنے والا ہے۔“
یہ سند صحیح ہے بشرطیکہ ابوعبیدہ بن عبداللہ بن مسعود کا اپنے والد سے سماع ثابت ہو، اور شیخین نے اسے روایت نہیں کیا۔

سیدنا ابوہریرہ رضی اللہ عنہ سے روایت ہے کہ انہوں نے نبی کریم ﷺ کو یہ فرماتے ہوئے سنا: ”جس نے یہ کلمات کہے: «سُبْحَانَ اللهِ، وَالْحَمْدُ لِلّٰهِ، وَلَا إِلٰهَ إِلَّا اللهُ، وَاللهُ أَكْبَرُ، وَلَا حَوْلَ وَلَا قُوَّةَ إِلَّا بِاللهِ» ”اللہ پاک ہے، تمام تعریفیں اللہ ہی کے لیے ہیں، اللہ کے سوا کوئی معبود نہیں، اللہ سب سے بڑا ہے، اور گناہوں سے بچنے کی ہمت اور نیکی کی طاقت اللہ ہی کی توفیق سے ہے“، تو اللہ تعالیٰ فرماتا ہے: میرے بندے نے خود کو میرے سپرد کر دیا اور وہ فرمانبردار ہو گیا۔“
یہ حدیث صحیح الاسناد ہے لیکن شیخین نے اسے روایت نہیں کیا۔