المستدرك على الصحيحين

صلہ بن زفر رحمہ اللہ بیان کرتے ہیں کہ ہم سیدنا عمار بن یاسر رضی اللہ عنہ کے پاس موجود تھے، انہوں نے بھنی ہوئی بکری لانے کا حکم دیا اور فرمایا: ”کھاؤ“، تو مجمع میں سے کچھ لوگ پیچھے ہٹ گئے اور کہا کہ ہم روزے سے ہیں، اس پر سیدنا عمار رضی اللہ عنہ نے فرمایا: ”جس نے شک والے دن روزہ رکھا، اس نے یقیناً ابوالقاسم ﷺ کی نافرمانی کی۔“
یہ حدیث شیخین کی شرط پر صحیح ہے لیکن شیخین نے اسے روایت نہیں کیا۔

سیدنا ابن عباس رضی اللہ عنہما سے روایت ہے کہ ایک اعرابی نبی کریم ﷺ کی خدمت میں حاضر ہوا اور عرض کیا کہ میں نے چاند یعنی رمضان کا چاند دیکھ لیا ہے، آپ ﷺ نے دریافت فرمایا: ”کیا تم گواہی دیتے ہو کہ اللہ کے سوا کوئی معبود نہیں؟“ اس نے عرض کیا: جی ہاں، آپ ﷺ نے پوچھا: ”کیا تم گواہی دیتے ہو کہ محمد اللہ کے رسول ہیں؟“ اس نے عرض کیا: جی ہاں، آپ ﷺ نے فرمایا: ”اے بلال! لوگوں میں اعلان کر دو کہ وہ کل روزہ رکھیں۔“
امام سفیان ثوری اور حماد بن سلمہ نے سماک بن حرب سے اس کی متابعت کی ہے۔

سیدنا ابن عباس رضی اللہ عنہما سے روایت ہے کہ رمضان کے چاند کی رات ایک اعرابی حاضر ہوا اور عرض کیا: اے اللہ کے رسول! میں نے چاند دیکھ لیا ہے، آپ ﷺ نے دریافت فرمایا: ”کیا تم اس بات کی گواہی دیتے ہو کہ اللہ کے سوا کوئی معبود نہیں اور محمد اللہ کے رسول ہیں؟“ اس نے عرض کیا: جی ہاں، آپ ﷺ نے فرمایا: ”پھر لوگوں میں پکار دو کہ وہ روزہ رکھیں۔“
اسی طرح فضل بن موسیٰ نے سفیان ثوری سے اسے روایت کیا ہے۔

سیدنا ابن عباس رضی اللہ عنہما سے روایت ہے کہ رمضان کے چاند کی رات ایک اعرابی حاضر ہوا اور عرض کیا: اے اللہ کے رسول! میں نے چاند دیکھ لیا ہے، آپ ﷺ نے فرمایا: ”کیا تم گواہی دیتے ہو کہ اللہ کے سوا کوئی معبود نہیں اور میں اللہ کا رسول ہوں؟“ اس نے عرض کیا: جی ہاں، آپ ﷺ نے فرمایا: ”پس اعلان کر دو کہ لوگ روزہ رکھیں۔“

سیدنا ابن عباس رضی اللہ عنہما سے روایت ہے کہ لوگوں کو رمضان کے چاند کے متعلق شک ہوا اور انہوں نے ارادہ کیا کہ (ثبوت نہ ہونے کی بنا پر) نہ تو قیام کریں گے اور نہ ہی روزہ رکھیں گے، اتنے میں حرہ کے علاقے سے ایک اعرابی آیا اور اس نے گواہی دی کہ اس نے چاند دیکھا ہے، چنانچہ نبی کریم ﷺ نے سیدنا بلال رضی اللہ عنہ کو حکم دیا تو انہوں نے لوگوں میں پکار کر اعلان کیا کہ وہ قیام بھی کریں اور روزہ بھی رکھیں۔
امام بخاری نے عکرمہ کی احادیث سے استدلال کیا ہے اور امام مسلم نے سماک بن حرب اور حماد بن سلمہ کی احادیث سے، اور یہ حدیث صحیح ہے لیکن شیخین نے اسے روایت نہیں کیا۔

سماک رحمہ اللہ بیان کرتے ہیں کہ میں رمضان کے شک والے دن عکرمہ رحمہ اللہ کے پاس گیا تو وہ کھانا کھا رہے تھے۔ انہوں نے کہا: ”قریب آؤ اور کھاؤ۔“ میں نے عرض کیا: ”میں روزے سے ہوں۔“ انہوں نے کہا: ”اللہ کی قسم! تمہیں قریب آ کر کھانا ہی پڑے گا۔“ میں نے کہا: ”تو پھر مجھے کوئی حدیث سنائیے۔“ انہوں نے کہا: ”مجھ سے سیدنا ابن عباس رضی اللہ اللہ عنہما نے بیان کیا کہ رسول اللہ ﷺ نے فرمایا: ”مہینے کا پیشگی استقبال نہ کرو، بلکہ چاند دیکھ کر روزہ رکھو اور چاند دیکھ کر ہی افطار کرو، پھر اگر تمہارے اور چاند کے درمیان بادل یا غبار حائل ہو جائے تو تیس دن کی گنتی پوری کرو۔““
یہ حدیث صحیح الاسناد ہے لیکن شیخین نے ان الفاظ کے ساتھ اسے روایت نہیں کیا۔