المستدرك على الصحيحين

سیدنا ابوہریرہ رضی اللہ عنہ سے روایت ہے کہ ایک شخص رسول اللہ ﷺ کی خدمت میں حاضر ہوا اور عرض کیا: اے اللہ کے رسول! مجھے ایسا عمل بتائیے جسے کر کے میں جنت میں داخل ہو جاؤں؟ آپ ﷺ نے فرمایا: ”نیکوکار بن جاؤ۔“ اس نے عرض کیا: میں کیسے جانوں کہ میں نیکوکار ہوں؟ آپ ﷺ نے فرمایا: ”اپنے پڑوسیوں سے پوچھو، اگر وہ کہیں کہ تم نیکوکار ہو تو تم نیکوکار ہو، اور اگر وہ کہیں کہ تم برے ہو تو تم برے ہو۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔

سیدنا انس بن مالک رضی اللہ عنہ بیان کرتے ہیں کہ عرض کیا گیا: اے اللہ کے رسول! اہل جنت کون ہیں؟ آپ ﷺ نے فرمایا: ”وہ شخص جسے موت نہ آئے یہاں تک کہ اس کے کان ان باتوں سے بھر جائیں جو اسے پسند ہیں (یعنی اس کی تعریف)۔“ عرض کیا گیا: اے اللہ کے رسول! اہل نار کون ہیں؟ آپ ﷺ نے فرمایا: ”وہ شخص جسے موت نہ آئے یہاں تک کہ اس کے کان ان باتوں سے بھر جائیں جو اسے ناپسند ہیں (یعنی اس کی برائی)۔“
یہ حدیث امام مسلم کی شرط پر صحیح ہے لیکن انہوں نے اسے روایت نہیں کیا۔

ام العلاء رضی اللہ عنہا - جو ایک انصاری خاتون ہیں جنہوں نے رسول اللہ ﷺ سے بیعت کی تھی - بیان کرتی ہیں کہ جب انصار نے مہاجرین کو ٹھہرانے کے لیے قرعہ اندازی کی تو ہمارے حصے میں سیدنا عثمان بن مظعون رضی اللہ عنہ آئے، ہم نے انہیں اپنے گھروں میں ٹھہرایا، پھر وہ اس بیماری میں مبتلا ہوئے جس میں ان کا انتقال ہو گیا۔ جب وہ فوت ہو گئے، انہیں غسل دیا گیا اور ان کے کپڑوں میں کفنایا گیا تو رسول اللہ ﷺ تشریف لائے۔ میں نے کہا: ”اے عثمان بن مظعون! تم پر اللہ کی رحمت ہو اے ابوسائب، میری تمہارے بارے میں گواہی ہے کہ یقیناً اللہ نے تمہیں معزز فرمایا ہے۔“ رسول اللہ ﷺ نے فرمایا: ”تمہیں کیسے معلوم ہوا کہ اللہ نے انہیں معزز فرمایا ہے؟“ میں نے عرض کیا: اے اللہ کے رسول! میرے ماں باپ آپ پر فدا ہوں، پھر اور کون ہوگا؟ رسول اللہ ﷺ نے فرمایا: ”وہ تو ان کے پاس یقین (موت) آ چکا ہے، بخدا! میں ان کے لیے خیر کی امید رکھتا ہوں، لیکن اللہ کی قسم! میں اللہ کا رسول ہو کر بھی نہیں جانتا کہ میرے ساتھ کیا کیا جائے گا۔“ ام العلاء کہتی ہیں: ”بخدا! میں اس کے بعد کبھی کسی کی پاکیزگی (حتمی طور پر) بیان نہیں کروں گی۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا!۔

طاؤس کے بیٹے (عبداللہ) اپنے والد سے روایت کرتے ہیں کہ وہ تشہد کے بعد کچھ کلمات کہا کرتے تھے جنہیں وہ بہت اہمیت دیتے تھے۔ میں نے پوچھا: کیا دونوں (تشہد) میں؟ انہوں نے کہا: نہیں بلکہ آخری تشہد کے بعد۔ میں نے پوچھا: وہ کیا ہیں؟ انہوں نے کہا: «أَعُوذُ بِاللَّهِ مِنْ عَذَابِ جَهَنَّمَ، وَأَعُوذُ بِاللَّهِ مِنْ شَرِّ الْمَسِيحِ الدَّجَّالِ، وَأَعُوذُ بِاللَّهِ مِنْ عذاب الْقَبْرِ، وَأَعُوذُ بِاللَّهِ مِنْ فِتْنَةِ الْمَحْيَا وَالْمَمَاتِ» ”میں اللہ کی پناہ مانگتا ہوں جہنم کے عذاب سے، اور میں اللہ کی پناہ مانگتا ہوں مسیح دجال کے شر سے، اور میں اللہ کی پناہ مانگتا ہوں قبر کے عذاب سے، اور میں اللہ کی پناہ مانگتا ہوں زندگی اور موت کے فتنے سے۔“ وہ ان کلمات کو بہت اہمیت دیتے تھے۔ ابن جریج کہتے ہیں کہ مجھے عبداللہ بن طاؤس نے اپنے والد کے واسطے سے سیدہ عائشہ رضی اللہ عنہا سے اور انہوں نے نبی کریم ﷺ سے یہ روایت بتائی۔
یہ حدیث قبر کے عذاب سے پناہ مانگنے کے بارے میں شیخین کی شرط پر صحیح ہے لیکن انہوں نے اسے روایت نہیں کیا۔ میں نے کتاب الایمان میں اس باب میں وہ احادیث املاء کروائی تھیں جو ان کی شرط پر صحیح تھیں مگر انہوں نے روایت نہیں کی تھیں، لیکن یہ حدیث وہاں املاء نہیں کروائی تھی۔