المستدرك على الصحيحين

عبداللہ بن بریدہ سے روایت ہے کہ وہ کہتے ہیں: مجھے بتایا گیا کہ ابوسبرہ بن سلمہ ہذلی نے ابنِ زیاد کو حوضِ محمد ﷺ کے بارے میں سوال کرتے ہوئے سنا، تو ابنِ زیاد نے کہا: میں اسے برحق نہیں سمجھتا، حالانکہ وہ اس سے پہلے ابوبرزہ اسلمی، براء بن عازب اور عائذ بن عمرو رضی اللہ عنہم سے پوچھ چکا تھا لیکن کہنے لگا: میں ان لوگوں کی تصدیق نہیں کرتا؛ تو ابوسبرہ نے کہا: کیا میں تمہیں ایسی حدیث نہ سناؤں جو (شک سے) شفا بخش دے؟ تمہارے والد نے مجھے مال دے کر امیر معاویہ رضی اللہ عنہ کی طرف بھیجا تھا، وہاں میری ملاقات عبداللہ بن عمرو رضی اللہ عنہما سے ہوئی، تو انہوں نے مجھے اپنی زبان سے یہ حدیث سنائی اور میں نے اپنے قلم سے اسے ویسے ہی لکھ لیا جیسا انہوں نے رسول اللہ ﷺ سے سنا تھا، میں نے اس میں ایک حرف کی بھی کمی بیشی نہیں کی؛ انہوں نے مجھے بتایا کہ رسول اللہ ﷺ نے فرمایا: ”بے شک اللہ تعالیٰ بدگوئی کرنے والے اور فحش بکنے والے کو پسند نہیں فرماتا، اور اس ذات کی قسم جس کے قبضۂ قدرت میں محمد ﷺ کی جان ہے! قیامت اس وقت تک قائم نہیں ہوگی جب تک فحش گوئی، بے حیائی، قطع رحمی اور پڑوسیوں سے برا سلوک عام نہ ہو جائے، امانت دار کو خائن اور خائن کو امانت دار سمجھا جانے لگے؛ اور مومن کی مثال شہد کی مکھی جیسی ہے کہ وہ ستھری چیز کھاتی ہے، ستھری چیز (شہد) نکالتی ہے اور ستھری جگہ پر بیٹھتی ہے، نہ وہ (پھول کو) خراب کرتی ہے اور نہ توڑتی ہے؛ اور مومن بندے کی مثال سونے کے اس عمدہ ٹکڑے جیسی ہے جسے (بھٹی میں) تپایا جائے تو وہ کھرا نکلتا ہے اور اگر اسے تولا جائے تو اس کے وزن میں کوئی کمی نہیں آتی“، اور آپ ﷺ نے فرمایا: ”تمہارے ملنے کی جگہ میرا حوض ہے، جس کی چوڑائی اس کی لمبائی کے برابر ہے، اور وہ اَیْلَہ سے مکہ کے درمیانی فاصلے سے بھی زیادہ وسیع ہے، یہ ایک ماہ کی مسافت ہے، اس پر ستاروں کی مانند چمکدار صراحیاں ہیں، اس کا پانی چاندی سے زیادہ سفید ہے، جو وہاں آئے گا اور اس سے ایک بار پی لے گا وہ اس کے بعد کبھی پیاسا نہیں ہو گا۔“ تو ابنِ زیاد نے کہا: مجھے کسی نے اس جیسی حدیث نہیں سنائی، میں گواہی دیتا ہوں کہ حوض برحق اور واجب ہے، پھر اس نے وہ صحیفہ لے لیا جو ابوسبرہ لائے تھے۔
یہ حدیث صحیح ہے، شیخین نے ابوسبرہ ہذلی کے علاوہ اس کے تمام راویوں سے احتجاج پر اتفاق کیا ہے، وہ ایک بڑے تابعی ہیں جن کا ذکر مسانید اور تاریخ کی کتب میں موجود ہے اور وہ غیر مطعون ہیں۔

ابوسبرہ ہذلی سے مروی ہے کہ انہوں نے یہی طویل حدیث ذکر فرمائی۔

سیدنا ابوبرزہ رضی اللہ عنہ سے روایت ہے کہ میں نے رسول اللہ ﷺ کو یہ فرماتے ہوئے سنا: ”میرا حوض اَیْلَہ سے صنعاء کے درمیانی فاصلے (جتنا وسیع) ہے، اس کی چوڑائی اس کی لمبائی کے برابر ہے، اس میں جنت سے دو پرنالے گرتے ہیں، ایک چاندی کا اور دوسرا سونے کا ہے، اس کا پانی شہد سے زیادہ میٹھا، برف سے زیادہ ٹھنڈا، دودھ سے زیادہ سفید اور مکھن سے زیادہ نرم ہے، اس پر آسمان کے ستاروں کی تعداد کے برابر صراحیاں ہیں، جو اس میں سے پی لے گا اسے جنت میں داخل ہونے تک کبھی پیاس نہیں لگے گی۔“
راوی کہتے ہیں کہ ایوب نے اس روایت میں یہ اضافہ کیا ہے کہ: ”وہ (جام) مومنوں کے ہاتھوں میں خود بخود اچھل کر آئیں گے۔“
یہ حدیث امام مسلم کی شرط پر صحیح ہے، کیونکہ انہوں نے ابوطلحہ راسبی کی دو احادیث سے احتجاج کیا ہے، اور ایوب سختیانی کی یہ روایت غریب اور صحیح ہے، لیکن شیخین نے اسے روایت نہیں کیا۔

سیدنا زید بن ارقم رضی اللہ عنہ سے روایت ہے کہ رسول اللہ ﷺ نے فرمایا: ”تم ان لوگوں کا لاکھواں حصہ بھی نہیں ہو جو حوض پر میرے پاس آئیں گے۔“ لوگوں نے ان سے پوچھا: (اس وقت) آپ لوگوں کی تعداد کتنی تھی؟ انہوں نے کہا: آٹھ سو یا نو سو۔
ابو حمزہ انصاری (طلحہ بن یزید) سے امام بخاری نے احتجاج کیا ہے۔

سیدنا زید بن ارقم رضی اللہ عنہ سے روایت ہے کہ رسول اللہ ﷺ نے فرمایا: ”تم قیامت کے دن حوض پر میرے پاس آنے والوں کا لاکھواں حصہ بھی نہیں ہو۔“ راوی کہتے ہیں کہ ہم نے زید رضی اللہ عنہ سے پوچھا: اس دن آپ لوگ کتنے تھے؟ انہوں نے کہا: چھ سو سے سات سو کے درمیان۔
یہ حدیث شیخین کی شرط پر صحیح ہے، لیکن انہوں نے اسے روایت نہیں کیا، اور انہوں نے اسے اس لیے چھوڑا ہے کیونکہ اس کے متن میں تعداد کے حوالے سے اختلاف پایا جاتا ہے، واللہ اعلم۔

یزید بن حیان تیمی سے روایت ہے کہ میں سیدنا زید بن ارقم رضی اللہ عنہ کے پاس موجود تھا جب عبیداللہ بن زیاد نے انہیں بلا بھیجا اور کہا: یہ کیسی حدیثیں ہیں جو مجھے آپ کے بارے میں پہنچی ہیں کہ آپ رسول اللہ ﷺ سے بیان کرتے ہیں اور یہ دعویٰ کرتے ہیں کہ جنت میں آپ ﷺ کا ایک حوض ہے؟ انہوں نے جواب دیا: ہمیں رسول اللہ ﷺ نے یہ حدیث سنائی تھی اور اس کا وعدہ فرمایا تھا؛ تو اس نے کہا: آپ جھوٹ بولتے ہیں، آپ (زید بن ارقم) بوڑھے ہو کر سٹھیا گئے ہیں؛ زید رضی اللہ عنہ نے فرمایا: بے شک میرے ان کانوں نے اسے رسول اللہ ﷺ سے سنا ہے اور میں نے آپ ﷺ کو یہ فرماتے ہوئے بھی سنا ہے کہ: ”جس نے مجھ پر جان بوجھ کر جھوٹ باندھا وہ اپنا ٹھکانہ جہنم میں بنا لے“، اور میں نے رسول اللہ ﷺ پر کبھی جھوٹ نہیں بولا۔
اس کا ایک شاہد امام مسلم کی شرط پر زید بن ارقم رضی اللہ عنہ سے مروی ہے جس میں حوض کا ذکر ان الفاظ کے علاوہ ہے۔