مسند أبي يعلى الموصلي

سیدنا ابوبکر صدیق رضی اللہ عنہ کے غلام سیدنا سعد رضی اللہ عنہ سے روایت ہے کہ رسول اللہ ﷺ نے سیدنا ابوبکر صدیق رضی اللہ عنہ سے فرمایا، اور سیدنا سعد رضی اللہ عنہ اس وقت ان کے مملوک تھے اور رسول اللہ ﷺ کو ان کی خدمت گزاری بے حد پسند تھی، آپ ﷺ نے ارشاد فرمایا: «أَعْتِقْ سَعْدًا» ”سعد کو آزاد کر دو“، اس پر سیدنا ابوبکر صدیق رضی اللہ عنہ نے عرض کی: اے اللہ کے رسول! یہاں ان کے سوا ہمارا کوئی اور (خادم) نہیں ہے، تو رسول اللہ ﷺ نے ارشاد فرمایا: «أَعْتِقْ سَعْدًا، أَتَتْكَ الرِّجَالُ، أَتَتْكَ الرِّجَالُ» ”سعد کو آزاد کر دو، تمہارے پاس (خدمت کے لیے) اور لوگ آ جائیں گے، تمہارے پاس اور لوگ آ جائیں گے۔“

سیدنا سعد رضی اللہ عنہ سے روایت ہے کہ انہوں نے بیان کیا: ”میں نے رسول اللہ ﷺ کی خدمتِ اقدس میں کچھ کھجوریں پیش کیں، تو لوگ (ایک کے بجائے) دو دو کھجوریں ملا کر کھانے لگے، جس پر رسول اللہ ﷺ نے ’قران‘ یعنی (اپنے ساتھیوں کی اجازت کے بغیر) ایک ساتھ دو دو کھجوریں ملا کر کھانے سے منع فرما دیا۔“

سیدنا دغفل رضی اللہ عنہ سے روایت ہے کہ ”نبی کریم ﷺ کی وفات اس حال میں ہوئی کہ آپ ﷺ کی عمرِ مبارک پینسٹھ برس تھی“۔