مصنف ابن ابي شيبه

حضرت جابر سے مروی ہے کہ نبی کریم صلی اللہ علیہ وآلہ وسلم عرفات تشریف لائے، جب سورج زائل ہوگیا تو آپ صلی اللہ علیہ وآلہ وسلم نے قصواء اونٹنی کا حکم فرمایا تو آپ صلی اللہ علیہ وآلہ وسلم کے لیے اس پر کجاوا ڈالا گیا، آپ صلی اللہ علیہ وآلہ وسلم بطن وادی میں تشریف لائے اور لوگوں کو خطبہ ارشاد فرمایا۔

حضرت محمد بن قیس ابن المطلب سے مروی ہے کہ نبی کریم صلی اللہ علیہ وآلہ وسلم نے عرفہ میں خطبہ ارشاد فرمایا۔

حضرت زہری سے مروی ہے کہ حضور صلی اللہ علیہ وآلہ وسلم یوم نحر میں خطبہ دیا کرتے تھے۔ بعد میں امراء کو مشغولیت درپیش ہوئی تو انہوں نے خطبہ کو اگلے دن تک موخر کردیا۔

حضرت مجاہد سے مروی ہے کہ نبی کریم صلی اللہ علیہ وآلہ وسلم نے یوم النحر میں لوگوں کو دو جمروں کے درمیان خطبہ دیا۔

حضرت عمر بن عبد العزیز لوگوں کو یوم الترویہ سے پہلے خطبہ دے دیتے اور حضرت ابن زبیر پورے دس دن خطبہ دیتے۔

حضرت عبد الرحمن بن اسود فرماتے ہیں کہ میں نے اپنے والد کو دیکھا وہ منبر پر حضرت ابن زبیر کے پاس گئے، جب وہ واپس اترے تو حضرت ابن زبیر نے تلبیہ پڑھا، میں نے اپنے والد سے عرض کیا کہ آپ نے ان سے کیا کہا تھا ؟ آپ نے فرمایا کہ میں نے ان سے کہا کہ میں نے سنا حضرت عمر یہاں منبر پر تلبیہ پڑھا کرتے تھے۔

حضرت مسروق سے مروی ہے کہ نبی کریم صلی اللہ علیہ وآلہ وسلم نے یوم النحر میں لوگوں کو خطبہ ارشاد فرمایا۔