مصنف ابن ابي شيبه

حضرت جابر سے مروی ہے کہ جب ہم لوگ وادی محسّر میں پہنچے تو نبی کریم صلی اللہ علیہ وآلہ وسلم نے ارشاد فرمایا : جمرات کی رمی کے لیے کنکریاں وادی محسّر سے لے لو۔

حضرت مجاہد رمی کے لیے کنکریاں مزدلفہ سے لیا کرتے تھے۔

حضرت اسماعیل بن عبد الملک فرماتے ہیں کہ حضرت سعید بن جبیر نے ہم سے فرمایا : جہاں سے چاہو کنکریاں اٹھا لو۔

محمد فرماتے ہیں کہ جس شخص نے رمی کرنی ہے وہ مزدلفہ سے کنکریاں اٹھائے۔

حضرت مکحول فرماتے ہیں کہ کنکریاں مزدلفہ سے اٹھاؤ۔

حضرت بکر رمی کے لیے کنکریاں مزدلفہ سے اٹھا لیا کرتے تھے۔

حضرت عطاء فرماتے ہیں جہاں سے چاہو کنکریاں اٹھا لو۔

حضرت قاسم مزدلفہ سے جمرات کی رمی کے لیے کنکریاں اٹھایا کرتے تھے۔

حضرت عبد الرحمن بن اسود فرماتے ہیں کہ ہم نے حضرت اسود کے لیے کنکریاں اٹھائیں جب ہم لوگ عرفات جا رہے تھے۔

حضرت محمد بن عبد الرحمن کے والد فرماتے ہیں کہ میں حضرت عبد اللہ کے ساتھ عرفہ سے منیٰ آیا جب ہم جمرات کے پاس پہنچ گئے تو آپ نے فرمایا میرے لیے کنکریاں جمع کرو، میں نے ان کے لیے سات کنکریاں اکٹھی کیں۔

حضرت شعبی فرماتے ہیں کہ جہاں سے چاہو کنکریاں اٹھا لو۔

حضرت ابن عباس رضی اللہ عنہما سے مروی ہے کہ نبی کریم صلی اللہ علیہ وآلہ وسلم نے عقبہ کی صبح مجھ سے فرمایا میرے لیے کنکریاں اکٹھی کرو، حضرت ابن عباس رضی اللہ عنہما فرماتے ہیں کہ میں نے آپ صلی اللہ علیہ وآلہ وسلم کے لیے چھوٹی چھوٹی کنکریاں جمع کیں، آپ صلی اللہ علیہ وآلہ وسلم نے فرمایا : ان جتنی کنکریوں سے رمی کرو۔