مصنف ابن ابي شيبه

حضرت عمران بن حدیر فرماتے ہیں کہ محمد قبر پر نشانی لگانے کو ناپسند فرماتے تھے۔

حضرت سلیم بن حیان، حضرت حماد اور ابراہیم قبر پر نشانی لگانے کو ناپسند فرماتے تھے۔

حضرت المطلب بن عبد اللہ بن حنطب سے مروی ہے کہ جب حضرت عثمان بن مظعون کی وفات ہوئی تو نبی اکرم (صلی اللہ علیہ وآلہ وسلم) نے ان کو جنت البقیع میں دفن فرمایا اور پھر ایک شخص سے فرمایا : فلاں چٹان کے پاس جا کر ایک پتھر لے کر آؤ تاکہ میں اس کو اس کی قبر پر بطور نشانی نصب کر دوں جس کی وجہ سے اس کو (بعد میں) ہم پہچان لیں۔

حضرت افلح فرماتے ہیں کہ حضرت قاسم نے وصیت فرمائی کہ اے بیٹے ! میری قبر پر مت لکھنا، اور میری قبر کو زیادہ بلند نہ کرنا مگر اتنا کہ اس سے پانی ہٹ جائے، (پانی نہ روکے) ۔

حضرت جابر سے مروی ہے کہ نبی کریم صلی اللہ علیہ وآلہ وسلم نے قبر پر تعمیر کرنے سے منع فرمایا، اور دوسری روایت میں آیا ہے اس پر لکھنے سے منع فرمایا ہے۔

حضرت مبارک فرماتے ہیں کہ حسن قبر پر تختی لگانے کو ناپسند فرماتے تھے۔

حضرت مغیرہ فرماتے ہیں کہ ابراہیم قبر پر مسجد بنانے کو ناپسند فرماتے تھے۔