المعجم الكبير للطبراني

سیدہ ام سلمہ رضی اللہ عنہا سے روایت ہے، وہ فرماتی ہیں: میں نے عرض کیا: یا رسول اللہ! عورتیں (اپنے کپڑے کس طرح لٹکائیں)؟ آپ ﷺ نے فرمایا: ”ایک بالشت لٹکا لیں۔“ میں نے عرض کیا: اس طرح تو ان کے پاؤں کھل جائیں گے۔ آپ ﷺ نے فرمایا: ”پھر ایک ہاتھ (تک) لٹکا لیں، اس سے زیادہ نہ بڑھائیں۔“

سیدہ ام سلمہ رضی اللہ عنہا سے روایت ہے کہ ایک عورت نے رسول اللہ ﷺ سے سوال کیا اور عرض کیا: یا رسول اللہ! مجھے استحاضہ کا خون آتا ہے، میں پاک نہیں ہوتی، تو کیا میں نماز چھوڑ دوں؟ آپ ﷺ نے فرمایا: ”نہیں، بلکہ اتنے دن اور راتیں نماز چھوڑ دو جتنے دن تمہیں حیض آیا کرتا تھا اور مہینے میں ان کی مقدار کے برابر، پھر غسل کرو، لنگوٹ باندھو اور نماز پڑھو۔“

سیدہ ام سلمہ رضی اللہ عنہا سے روایت ہے کہ رسول اللہ ﷺ کے زمانے میں ایک عورت کو مسلسل خون آتا تھا، تو سیدہ ام سلمہ رضی اللہ عنہا نے اس کے بارے میں نبی کریم ﷺ سے استفسار کیا، تو آپ ﷺ نے فرمایا: ”وہ ان راتوں اور دنوں کی گنتی دیکھے جن میں اسے حیض آیا کرتا تھا اور اتنے دن نماز چھوڑ دے، پھر جب یہ (مدت) گزر جائے تو غسل کرے، کپڑے سے لنگوٹ باندھے اور نماز پڑھے۔“

سیدہ ام سلمہ رضی اللہ عنہا سے، وہ نبی کریم ﷺ سے (اسی موضوع پر) حدیث روایت کرتی ہیں۔

سیدہ ام سلمہ رضی اللہ عنہا سے روایت ہے کہ رسول اللہ ﷺ کے زمانے میں ایک عورت کو مسلسل خون آتا تھا، تو سیدہ ام سلمہ رضی اللہ عنہا نے اس کے بارے میں نبی کریم ﷺ سے استفسار کیا، تو نبی کریم ﷺ نے فرمایا: ”وہ ان ایام اور راتوں کی گنتی دیکھے جن میں اسے حیض آیا کرتا تھا اس سے پہلے کہ اسے یہ (استحاضہ) لاحق ہوا، اور مہینے میں ان کی مقدار کے برابر، اور اسی قدر نماز چھوڑ دے، پھر جب یہ (مدت) گزر جائے اور نماز کا وقت آ جائے تو غسل کرے اور نماز پڑھے۔“