المعجم الكبير للطبراني

سیدنا ہانی بن یزید رضی اللہ عنہ سے روایت ہے کہ وہ اپنی قوم کے کچھ لوگوں کے ساتھ رسول اللہ ﷺ کی خدمت میں وفد لے کر حاضر ہوئے تو رسول اللہ ﷺ نے سنا کہ لوگ انہیں ابوالحکم کی کنیت سے پکار رہے ہیں، آپ ﷺ نے فرمایا: ”یہ لوگ تمہیں ابوالحکم کیوں کہتے ہیں؟“ انہوں نے عرض کیا: یا رسول اللہ! میں اپنی قوم کے درمیان جو معاملہ پیش آتا اس میں فیصلہ کرتا تھا اور دونوں فریق راضی ہو جاتے تھے، اسی وجہ سے مجھے ابوالحکم کہا جانے لگا، حالانکہ میرا کوئی بیٹا نہیں، پھر بھی میں ابوالحکم ہی کہلاتا ہوں۔ آپ ﷺ نے پوچھا: ”کیا تمہاری اولاد ہے؟“ انہوں نے عرض کیا: جی ہاں۔ آپ ﷺ نے پوچھا: ”تمہارے سب سے بڑے بیٹے کا نام کیا ہے؟“ انہوں نے عرض کیا: شریح۔ آپ ﷺ نے فرمایا: ”تو تم ابوشریح ہو۔“

سیدنا ہانی بن یزید رضی اللہ عنہ فرماتے ہیں: میں اپنی قوم کے وفد کے ساتھ نبی کریم ﷺ کی خدمت میں حاضر ہوا تو آپ ﷺ نے دیکھا کہ لوگ مجھے ابوالحکم کہہ کر پکارتے ہیں، تو آپ ﷺ نے فرمایا: ”اللہ ہی حَکَم ہے، تمہیں ابوالحکم کیوں کہا جاتا ہے؟“ میں نے عرض کیا: جب میری قوم کے درمیان کوئی معاملہ پیش آتا تو وہ میرے پاس فیصلے کے لیے آتے، میں ان کے درمیان فیصلہ کرتا تو وہ میرے فیصلے پر راضی ہو جاتے۔ آپ ﷺ نے پوچھا: ”کیا تمہاری کوئی اولاد ہے؟“ میں نے عرض کیا: جی ہاں۔ آپ ﷺ نے پوچھا: ”تمہارے سب سے بڑے بیٹے کا نام کیا ہے؟“ میں نے عرض کیا: شریح۔ آپ ﷺ نے فرمایا: ”تو تم ابوشریح ہو۔“

سیدنا ہانی بن یزید رضی اللہ عنہ سے روایت ہے کہ وہ اپنی قوم کے ساتھ رسول اللہ ﷺ کی خدمت میں وفد لے کر حاضر ہوئے تو آپ ﷺ نے سنا کہ لوگ ہانی کو ابوالحکم کہہ کر پکار رہے ہیں، تو رسول اللہ ﷺ نے انہیں بلایا اور فرمایا: ”اللہ ہی حَکَم ہے، تمہیں ابوالحکم کیوں کہا جاتا ہے، کیا تمہارا کوئی بیٹا اسی نام کا ہے؟“ انہوں نے عرض کیا: نہیں، بلکہ میری قوم جب کسی معاملے میں اختلاف کرتی تو میرے پاس آتی، میں ان کے درمیان فیصلہ کرتا تو دونوں فریق راضی ہو جاتے۔ آپ ﷺ نے فرمایا: ”یہ تو بہت اچھی بات ہے۔“

سیدنا ہانی رضی اللہ عنہ فرماتے ہیں: میں نے عرض کیا: یا رسول اللہ! مجھے کوئی ایسی بات بتائیں جو میرے لیے جنت واجب کر دے۔ آپ ﷺ نے فرمایا: ”جنت واجب کرنے والی چیزیں کھانا کھلانا اور سلام پھیلانا ہیں۔“

سیدنا ہانی رضی اللہ عنہ فرماتے ہیں: میں نے عرض کیا: یا رسول اللہ! مجھے کوئی عمل بتائیں۔ آپ ﷺ نے فرمایا: ”کھانا کھلاؤ اور سلام پھیلاؤ۔“

سیدنا ہانی رضی اللہ عنہ فرماتے ہیں: میں نے عرض کیا: یا رسول اللہ! مجھے کوئی ایسا عمل بتائیں جو مجھے جنت میں داخل کر دے۔ آپ ﷺ نے فرمایا: ”مغفرت واجب کرنے والی چیزوں میں سے سلام کرنا اور اچھی بات کرنا ہے۔“

سیدنا ہانی بن یزید رضی اللہ عنہ سے روایت ہے کہ انہوں نے عرض کیا: یا رسول اللہ! مجھے کوئی ایسی بات بتائیں جو جنت واجب کر دے۔ آپ ﷺ نے فرمایا: ”اچھی بات کرنے اور کھانا کھلانے کو لازم پکڑو۔“