المعجم الكبير للطبراني

سیدنا محیصہ بن مسعود انصاری رضی اللہ عنہ کی بیٹی اپنے والد سے بیان کرتی ہیں کہ رسول اللہ ﷺ نے فرمایا: ”یہود کے جس مرد پر تم قابو پاؤ اسے قتل کر دو۔“ چنانچہ محیصہ نے ابن سنینہ پر حملہ کیا - وہ یہود کے تاجروں میں سے ایک آدمی تھا جو ان کے ساتھ میل جول اور کاروبار رکھتا تھا - اور اسے قتل کر دیا۔ اس وقت حویصہ ابھی مسلمان نہیں ہوئے تھے، اور وہ محیصہ سے بڑے تھے، جب محیصہ نے اسے قتل کیا تو حویصہ انہیں مارنے لگے اور کہنے لگے: اے اللہ کے دشمن! تو نے اسے قتل کر دیا؟ سن لے، اللہ کی قسم! تیرے پیٹ میں اکثر چربی اسی کے مال سے پلی ہے۔ میں نے کہا: ”اللہ کی قسم! اگر مجھے تیرے قتل کا بھی حکم دیا جاتا تو میں تیری گردن بھی مار دیتا۔“ راوی کہتے ہیں: اللہ کی قسم! یہی وہ واقعہ تھا جو حویصہ کے اسلام قبول کرنے کا پہلا سبب بنا، انہوں نے کہا: اللہ کی قسم! اگر محمد تجھے میرے قتل کا حکم دیں تو تو مجھے بھی قتل کر دے گا؟ محیصہ نے کہا: ”ہاں، اللہ کی قسم!“ حویصہ نے کہا: اللہ کی قسم! جو دین اس مقام تک پہنچ گیا ہو وہ واقعی عجیب ہے۔ چنانچہ حویصہ مسلمان ہو گئے۔

سیدنا محیصہ بن مسعود انصاری رضی اللہ عنہ سے روایت ہے کہ ان کا ایک غلام پچھنے لگانے والا تھا جسے نافع ابوطیبہ کہا جاتا تھا، وہ رسول اللہ ﷺ کے پاس گئے اور اس کی کمائی کے بارے میں پوچھا تو آپ ﷺ نے فرمایا: ”اس کے قریب مت جاؤ۔“ انہوں نے رسول اللہ ﷺ سے پھر پوچھا تو آپ ﷺ نے فرمایا: ”اسے اپنے پانی ڈھونے والے اونٹ کو کھلا دو، اسے اس کے پیٹ میں ڈال دو۔“

سیدنا محیصہ بن مسعود رضی اللہ عنہ سے روایت ہے، وہ کہتے ہیں: میرا ایک غلام پچھنے لگانے والا تھا جسے ابوطیبہ کہا جاتا تھا، اس نے بہت زیادہ کمائی کی، جب ”رسول اللہ ﷺ نے پچھنے لگانے والے کی کمائی سے منع فرمایا“ تو میں نے آپ سے اس کی اجازت طلب کی، آپ نے انکار فرما دیا، پھر میں مسلسل آپ سے بات کرتا اور اپنی ضرورت بیان کرتا رہا یہاں تک کہ آپ ﷺ نے مجھ سے فرمایا: ”اس کی کمائی اپنے پانی ڈھونے والے اونٹ کے پیٹ میں ڈال دو۔“

سیدنا محیصہ رضی اللہ عنہ سے روایت ہے کہ انہوں نے پچھنے لگانے والے کی کمائی کے بارے میں رسول اللہ ﷺ سے اجازت طلب کی، ”آپ ﷺ نے انہیں منع فرما دیا، پھر وہ مسلسل رسول اللہ ﷺ سے رجوع کرتے اور اپنی ضرورت بیان کرتے رہے یہاں تک کہ“ آپ ﷺ نے انہیں اجازت دے دی کہ وہ اپنے پانی ڈھونے والے اونٹ اور اپنے غلاموں کو اس میں سے کھلائیں۔