المعجم الكبير للطبراني

قاسم ابوعبدالرحمن رحمہ اللہ بیان کرتے ہیں: میں سیدنا معاویہ رضی اللہ عنہ کے پاس بیٹھا تھا کہ انہوں نے سیدنا عبداللہ بن عمرو رضی اللہ عنہما کو بلوا بھیجا اور فرمایا: یہ کیسی حدیثیں ہیں جن کے بارے میں مجھے خبر پہنچی ہے کہ تم انہیں بیان کرتے ہو؟ میں نے ارادہ کر لیا تھا کہ تمہیں شام سے جلا وطن کر دوں۔ انہوں نے کہا: سنیے! اللہ کی قسم! اگر (میرے گھر کی) عورتیں نہ ہوتیں تو میں ایک گھڑی بھی یہاں رہنا پسند نہ کرتا۔ پھر سیدنا معاویہ رضی اللہ عنہ نے (ان سے) پوچھا: تم ”طِلاء“ (پکائی ہوئی انگور کی شیرہ) کے بارے میں کیا حدیث بیان کرتے ہو؟ انہوں نے کہا: سنیے! میرے لیے یہ حلال نہیں کہ میں رسول اللہ ﷺ پر وہ بات کہوں جو آپ ﷺ نے نہیں فرمائی، میں نے آپ ﷺ کو یہ فرماتے سنا ہے: ”جو شخص مجھ پر وہ بات گھڑے جو میں نے نہیں کہی، وہ اپنا ٹھکانہ جہنم میں بنا لے۔“
اور میں نے رسول اللہ ﷺ کو شراب کے بارے میں یہ فرماتے سنا: ”جو شخص اسے اپنی ہتھیلی پر رکھے، اس کی کوئی دعا قبول نہیں ہوتی، اور جو اس کے پینے پر ہمیشگی اختیار کرے اسے خبال پلایا جائے گا۔“ اور خبال جہنم کی ایک وادی ہے۔ پھر سیدنا عبداللہ بن عمرو رضی اللہ عنہما نے کہا: اے معاویہ! میرا خیال ہے کہ آپ نے بھی وہی کچھ سنا ہے جو میں نے سنا ہے۔ راوی کہتے ہیں: سیدنا معاویہ رضی اللہ عنہ نے ان کی تصدیق کرنے کا ارادہ کیا پھر خاموش ہو گئے۔

قاسم ابوعبدالرحمن بیان کرتے ہیں: انہوں نے سیدنا معاویہ رضی اللہ عنہ کو یہ کہتے سنا: رسول اللہ ﷺ رمضان سے ایک دن پہلے منبر پر کھڑے ہو کر فرمایا کرتے تھے: ”روزہ فلاں فلاں دن سے ہے، اور ہم پہلے سے روزہ رکھ لیتے ہیں، تو جو چاہے پہلے سے رکھ لے اور جو چاہے چھوڑ دے۔“