المعجم الكبير للطبراني

عبداللہ بن عامر یحصبی رحمہ اللہ کہتے ہیں: میں نے سیدنا معاویہ رضی اللہ عنہ کو دمشق میں منبر پر یہ کہتے سنا: اے لوگو! رسول اللہ ﷺ کی احادیث (بیان کرنے) سے بچو، سوائے اس حدیث کے جو سیدنا عمر رضی اللہ عنہ کے دور میں بیان کی جاتی تھی، کیونکہ سیدنا عمر رضی اللہ عنہ ایسے شخص تھے جو اللہ کے معاملے میں لوگوں کو ڈراتے تھے۔ پھر میں نے انہیں یہ کہتے سنا: سن لو! میں نے رسول اللہ ﷺ کو یہ فرماتے سنا: ”جس کے ساتھ اللہ بھلائی کا ارادہ فرماتا ہے، اسے دین کی سمجھ عطا فرما دیتا ہے۔“
سن لو! اور میں نے آپ ﷺ کو یہ فرماتے سنا: ”میں تو صرف خزانچی ہوں، دینے والا تو اللہ ہے، تو جسے میں خوش دلی سے کچھ دوں اس کے لیے اس میں برکت ڈالی جاتی ہے، اور جسے میں سوال کرنے پر کچھ دوں تو اس کی مثال اس شخص کی سی ہے جو کھاتا ہے مگر سیر نہیں ہوتا۔“
سن لو! اور میں نے رسول اللہ ﷺ کو یہ فرماتے سنا: ”میری امت میں سے ایک گروہ ہمیشہ اللہ کے دین پر قائم رہے گا، انہیں مخالفت کرنے والے یا ان کا ساتھ چھوڑنے والے نقصان نہیں پہنچا سکیں گے، یہاں تک کہ اللہ کا حکم آ جائے اور وہ لوگوں پر غالب ہوں۔“

عبداللہ بن عامر یحصبی رحمہ اللہ بیان کرتے ہیں: میں نے سیدنا معاویہ بن ابی سفیان رضی اللہ عنہ کو یہ کہتے سنا: رسول اللہ ﷺ نے فرمایا: ”میری امت ہمیشہ حق پر قائم رہے گی، جو ان سے لڑے یا جنگ کرے وہ اس سے قیامت تک لڑتے رہیں گے۔“

عبداللہ بن عامر یحصبی رحمہ اللہ بیان کرتے ہیں: میں نے سیدنا معاویہ رضی اللہ عنہ کو یہ کہتے سنا: میں نے رسول اللہ ﷺ کو فرماتے سنا: ”جس کے ساتھ اللہ بھلائی کا ارادہ فرماتا ہے، اسے دین کی سمجھ عطا فرما دیتا ہے۔“

سیدنا معاویہ بن ابی سفیان رضی اللہ عنہ سے روایت ہے، وہ فرماتے ہیں: میں نے رسول اللہ ﷺ کو فرماتے سنا: ”میں تو صرف خزانچی ہوں، دینے والا تو اللہ ہے، تو جسے میں خوش دلی کے ساتھ کچھ دوں تو اس میں برکت ڈالی جاتی ہے، اور جسے میں نفس کی حرص اور کثرتِ سوال کی وجہ سے کچھ دوں تو اس کی مثال اس شخص کی سی ہے جو کھاتا ہے مگر سیر نہیں ہوتا۔“

عبداللہ بن عامر یحصبی رحمہ اللہ سے روایت ہے کہ انہوں نے سیدنا معاویہ بن ابی سفیان رضی اللہ عنہ کو یہ کہتے سنا: میں نے رسول اللہ ﷺ کو منبر پر یہ فرماتے سنا: ”میں تو صرف خزانچی ہوں، دینے والا تو اللہ ہے، تو جسے میں خوش دلی سے کچھ دوں تو اس میں برکت ڈالی جاتی ہے، اور جسے میں نفس کی حرص اور کثرتِ سوال کی وجہ سے کچھ دوں تو اس کی مثال اس شخص کی سی ہے جو کھاتا ہے مگر سیر نہیں ہوتا۔“