المعجم الكبير للطبراني

سیدنا عرباض بن ساریہ رضی اللہ عنہ بیان کرتے ہیں کہ رسول اللہ ﷺ نے ہمیں ایک ایسا وعظ فرمایا جس سے آنکھیں بہہ پڑیں اور دل خوفزدہ ہو گئے، ہم نے عرض کیا: یا رسول اللہ! یہ تو الوداع کرنے والے کا وعظ معلوم ہوتا ہے، سو ہمیں کچھ نصیحت فرمائیے۔ آپ ﷺ نے فرمایا: ”میں تمہیں اللہ سے ڈرنے، اور سننے اور اطاعت کرنے کی وصیت کرتا ہوں، اگرچہ وہ (حکمران) حبشی غلام ہی کیوں نہ ہو، کیونکہ تم میں سے جو میرے بعد زندہ رہے گا وہ بہت اختلاف دیکھے گا، سو تم میری سنت اور میرے بعد ہدایت یافتہ خلفائے راشدین کی سنت کو لازم پکڑنا، اور اسے مضبوطی سے دانتوں سے پکڑ لینا، اور نئی نکالی ہوئی باتوں سے بچنا، کیونکہ ہر بدعت گمراہی ہے۔“

سیدنا عرباض بن ساریہ رضی اللہ عنہ بیان کرتے ہیں کہ رسول اللہ ﷺ نے ہمیں ایک ایسا وعظ فرمایا جس سے آنکھیں بہہ پڑیں اور دل خوفزدہ ہو گئے، تو ایک صحابی نے عرض کیا: یا رسول اللہ! یہ تو الوداع کرنے والے کا وعظ ہے، سو ہم سے کیا عہد لیتے ہیں؟ آپ ﷺ نے فرمایا: ”میں تمہیں اللہ سے ڈرنے، اور سننے اور اطاعت کرنے کی وصیت کرتا ہوں، اگرچہ وہ حبشی غلام ہی کیوں نہ ہو، کیونکہ تم میں سے جو میرے بعد زندہ رہے گا وہ بہت اختلاف دیکھے گا، سو نئی نکالی ہوئی باتوں سے بچنا کیونکہ وہ گمراہی ہیں، اور میری سنت اور میرے بعد ہدایت یافتہ خلفاء کی سنت کو لازم پکڑنا، اسے دانتوں سے مضبوطی سے پکڑ لینا۔“

سیدنا عرباض بن ساریہ رضی اللہ عنہ کہتے ہیں: رسول اللہ ﷺ نے ہمیں ایک ایسا وعظ فرمایا جس سے آنکھیں بہہ پڑیں اور دل خوفزدہ ہو گئے، ہم نے عرض کیا: یا رسول اللہ! یہ تو الوداع کرنے والے کا وعظ ہے، سو آپ ہم سے کیا عہد لیتے ہیں؟ آپ ﷺ نے فرمایا: ”میں نے تمہیں ایسے سفید (روشن) راستے پر چھوڑا ہے کہ اس کی رات بھی اس کے دن جیسی ہے، میرے بعد اس سے صرف ہلاک ہونے والا ہی ہٹے گا، اور تم میں سے جو زندہ رہے گا وہ بہت اختلاف دیکھے گا، سو تم اپنی جانی پہچانی میری سنت اور خلفائے راشدین کی سنت کو لازم پکڑنا، اور اطاعت لازم پکڑنا، اگرچہ وہ حبشی غلام ہی کیوں نہ ہو، اسے دانتوں سے مضبوطی سے پکڑ لینا، بے شک مومن اس اونٹ کی طرح ہے جس کی ناک میں نکیل ہو، جہاں بھی اسے موڑا جائے وہ مڑ جاتا ہے۔“

سیدنا عرباض بن ساریہ رضی اللہ عنہ بیان کرتے ہیں کہ رسول اللہ ﷺ نے ہمیں فجر کی نماز پڑھائی، پھر اسی طرح کی حدیث بیان کی۔

عرباض رضی اللہ عنہ بنو سلیم قبیلے کے ایک فرد تھے۔ وہ بیان کرتے ہیں کہ رسول اللہ ﷺ ہمارے پاس تشریف لائے اور لوگوں کو وعظ فرمایا، انہیں ترغیب دی اور ڈرایا، اور جو کچھ اللہ نے چاہا وہ ارشاد فرمایا، اور فرمایا: ”اللہ کی عبادت کرو اور اس کے ساتھ کسی کو شریک نہ ٹھہراؤ، اور جسے اللہ نے تمہارا حاکم بنایا ہو اس کی اطاعت کرو، اور جسے یہ معاملہ (حکومت) سونپا گیا ہو اس سے نزاع نہ کرو، اگرچہ وہ کالا غلام ہی کیوں نہ ہو، اور اپنے نبی کی سنت اور ہدایت یافتہ خلفائے راشدین کی جو سنت تم جانتے ہو اسے لازم پکڑنا، اور اسے دانتوں سے مضبوطی سے پکڑ لینا۔“