المعجم الكبير للطبراني

ہیاج رحمہ اللہ کہتے ہیں: ان کے والد کا ایک غلام بھاگ گیا تھا، تو والد نے نذر مانی کہ اگر اس پر قابو پا لیں تو اس کا کوئی حصہ کاٹ دیں گے۔ جب وہ اس پر قابو پا گئے تو انہوں نے مجھے سیدنا عمران بن حصین رضی اللہ عنہ کے پاس بھیجا، میں نے ان سے پوچھا، تو سیدنا عمران رضی اللہ عنہ نے فرمایا: اپنے والد سے کہو کہ وہ اپنے غلام کو آزاد کر دیں یا اپنی قسم کا کفارہ ادا کریں، ”کیونکہ رسول اللہ ﷺ ہمیں صدقہ کرنے کی ترغیب دیتے اور مثلہ سے منع فرماتے تھے۔“ پھر میں سیدنا سمرہ رضی اللہ عنہ کے پاس گیا اور ان سے پوچھا تو انہوں نے بھی سیدنا عمران رضی اللہ عنہ جیسی بات کہی۔ اسی طرح اسے معمر، ہمام اور قتادہ نے حسن سے، انہوں نے ہیاج سے روایت کیا ہے، ”جبکہ سعید بن ابی عروبہ اور ہمام بن یحییٰ نے اس کی مخالفت کی ہے۔“

راوی کہتے ہیں: ہیاج بن عمران رحمہ اللہ سیدنا عمران بن حصین رضی اللہ عنہ کے پاس آئے، اور ان کے والد نے اپنے ایک غلام کے بارے میں کہا تھا: وہ بھاگ گیا ہے، اگر میں اس پر قابو پا لوں تو اس کا کوئی حصہ، یا اس کا ہاتھ کاٹ دوں گا۔ پھر وہ اس پر قابو پا گئے۔ تو ہیاج سیدنا عمران رضی اللہ عنہ کے پاس گئے اور ان سے اس کے بارے میں پوچھا، تو انہیں اپنے والد کی بات بتائی، سیدنا عمران رضی اللہ عنہ نے فرمایا: اپنے والد سے کہو کہ وہ اپنی قسم کا کفارہ ادا کریں یا اپنے غلام کو آزاد کر دیں، اور اس کا کوئی حصہ نہ کاٹیں، ”کیونکہ نبی اللہ ﷺ اپنے خطبے میں صدقہ کی ترغیب دیتے اور مثلہ سے منع فرماتے تھے۔“ پھر انہوں نے بیان کیا کہ وہ سیدنا سمرہ بن جندب رضی اللہ عنہ کے پاس آئے تو انہوں نے بھی سیدنا عمران رضی اللہ عنہ جیسی بات کہی۔

ہیاج بن عمران برجمی رحمہ اللہ سے مروی ہے کہ ان کے والد کا ایک غلام بھاگ گیا تھا، تو انہوں نے اللہ عزوجل سے نذر مانی تھی کہ اگر وہ اس پر قابو پا گئے تو اس کا ہاتھ کاٹ دیں گے۔ جب وہ سیدنا عمران بن حصین رضی اللہ عنہ کے پاس آیا تو انہوں نے فرمایا: اپنے والد سے کہو ایسا نہ کریں، ”کیونکہ میں نے رسول اللہ ﷺ کو اپنے خطبے میں صدقہ کی ترغیب دیتے اور مثلہ سے منع فرماتے سنا ہے۔“ اپنے والد سے کہو کہ وہ اپنی قسم کا کفارہ ادا کریں اور اپنے غلام سے درگزر کریں۔