المعجم الكبير للطبراني

سیدنا عقبہ بن عامر رضی اللہ عنہ سے روایت ہے کہ ایک عورت نبی کریم ﷺ کے پاس آئی اور عرض کیا: یا رسول اللہ! کیا میں اپنی والدہ کی طرف سے حج کروں، وہ وفات پا چکی ہیں؟ آپ ﷺ نے فرمایا: ”بتاؤ اگر تمہاری والدہ پر قرض ہوتا اور تم اسے ادا کر دیتیں تو کیا وہ قبول نہ ہوتا؟“ اس نے کہا: کیوں نہیں۔ چنانچہ آپ ﷺ نے اسے حکم دیا کہ وہ اپنی والدہ کی طرف سے حج کرے۔ پھر ایک اور عورت آئی اور عرض کیا: کیا میں اپنے دودھ پیتے بیٹے کو ساتھ لے کر حج کروں؟ آپ ﷺ نے فرمایا: ”ہاں۔“

سیدنا عقبہ بن عامر رضی اللہ عنہ سے روایت ہے کہ انہوں نے رسول اللہ ﷺ سے اپنی بہن کے بارے میں پوچھا جس نے نذر مانی تھی کہ وہ پیدل چل کر بیت اللہ جائے گی۔ آپ ﷺ نے فرمایا: ”اللہ تعالیٰ تمہاری بہن کی اس نذر سے بے نیاز ہے، وہ سواری پر جائے اور ایک اونٹ قربان کرے۔“