المعجم الكبير للطبراني

سیدنا عبداللہ بن عمر رضی اللہ عنہما سے روایت ہے کہ نبی کریم ﷺ نے اعتکاف کیا اور لوگوں سے خطاب کرتے ہوئے فرمایا: ”جب تم میں سے کوئی نماز میں کھڑا ہوتا ہے تو وہ اپنے رب سے سرگوشی کرتا ہے، تو تم میں سے ہر ایک کو معلوم ہونا چاہیے کہ وہ اپنے رب سے کیا سرگوشی کر رہا ہے، اور تم میں سے کوئی نماز میں قرأت کرتے ہوئے دوسرے پر آواز بلند نہ کرے۔“

سیدنا عبداللہ بن عمر رضی اللہ عنہما سے روایت ہے کہ رسول اللہ ﷺ نے فرمایا: ”جب تم میں سے کوئی نماز پڑھ رہا ہو تو کسی کو اپنے آگے سے گزرنے نہ دے، اگر وہ انکار کرے تو اس سے لڑے، کیونکہ اس کے ساتھ اس کا قرین (ساتھی شیطان) ہوتا ہے۔“

سیدنا عبداللہ بن عمر رضی اللہ عنہما سے روایت ہے کہ انہوں نے نبی کریم ﷺ کو دیکھا کہ جب آپ ﷺ کی سواری آپ ﷺ کو لے کر سیدھی کھڑی ہو جاتی تو آپ ﷺ تلبیہ پکارتے۔

سیدنا عبداللہ بن عمر رضی اللہ عنہما بیان کرتے ہیں: ”رسول اللہ ﷺ نے اہل مدینہ کے لیے ذوالحلیفہ، اہل شام کے لیے جحفہ، اہل نجد کے لیے قرن، اور اہل یمن کے لیے یلملم میقات مقرر کیا۔“

سیدنا عبداللہ بن عمر رضی اللہ عنہما سے روایت ہے کہ نبی کریم ﷺ نے خطبہ دیا تو فرمایا: ”اما بعد۔“