المعجم الكبير للطبراني

…ابن عباس رضی اللہ عنہما بیان کرتے ہیں: جب نبی اللہ ﷺ کو اسراء (شب کا سفر) کرایا گیا تو آپ ﷺ صبح کے وقت مکہ میں الگ تھلگ اور غمگین بیٹھے تھے۔ اس دوران اللہ کا دشمن ابوجہل آپ ﷺ کے پاس آیا اور تمسخر اڑاتے ہوئے کہا: کیا کوئی بات ہوئی ہے؟ آپ ﷺ نے فرمایا: ”ہاں۔“ اس نے کہا: آپ ﷺ نے فرمایا: ”مجھے آج رات بیت المقدس تک لے جایا گیا۔“ اس نے کہا: پھر تو صبح ہمارے درمیان (یہاں) موجود ہو؟ آپ ﷺ نے فرمایا: ”ہاں۔“ ابوجہل نے یہ ظاہر نہ ہونے دیا کہ وہ آپ ﷺ کو جھٹلا رہا ہے، اس خدشے سے کہ اگر اس نے اپنی قوم کو بلایا تو وہ آپ ﷺ سے یہ بات ماننے سے انکار کر دیں گے۔ چنانچہ اس نے کہا: کیا خیال ہے، اگر میں آپ کی قوم کو بلا لاؤں تو کیا آپ انہیں بھی وہی بات بتائیں گے جو مجھے بتائی؟ آپ ﷺ نے فرمایا: ”ہاں۔“ تو ابوجہل نے پکارا: اے بنی کعب بن لؤی! آ جاؤ۔ چنانچہ مجلسیں سمٹ کر ان دونوں کے پاس آ بیٹھیں۔ ابوجہل نے کہا: اپنی قوم کو وہی بات بتائیے جو مجھے بتائی تھی۔ آپ ﷺ نے فرمایا: ”مجھے آج رات لے جایا گیا۔“ اس نے پوچھا: کہاں تک؟ آپ ﷺ نے فرمایا: ”بیت المقدس تک۔“ لوگوں نے کہا: پھر آپ صبح ہمارے درمیان موجود ہیں؟ آپ ﷺ نے فرمایا: ”ہاں۔“ اس پر کچھ لوگ (تعجب سے) تالی بجانے لگے اور کچھ نے اس بات پر تعجب کرتے ہوئے، اسے جھوٹ سمجھتے ہوئے اپنے سر پر ہاتھ رکھ لیا۔ ان لوگوں میں کچھ ایسے بھی تھے جو اس مسجد (بیت المقدس) کا سفر کر چکے تھے اور اسے دیکھ چکے تھے، انہوں نے کہا: کیا آپ ہمیں مسجد کا حلیہ بتا سکتے ہیں؟ آپ ﷺ نے فرمایا: ”ہاں۔“ نبی اللہ ﷺ فرماتے ہیں: ”میں نے ان کے سامنے اس کا حلیہ بیان کیا، یہاں تک کہ کچھ حلیہ بتاتے ہوئے مجھ پر (تفصیل) مشتبہ ہو گئی۔“ آپ ﷺ نے فرمایا: ”تو مسجد کو میرے سامنے لایا گیا اور میں اسے دیکھتا رہا، یہاں تک کہ وہ دار عقیل یا دار عقال کے قریب رکھی گئی، اور میں اسے دیکھتے ہوئے اس کا حلیہ بیان کرتا رہا۔“ اس پر لوگوں نے کہا: اللہ کی قسم! حلیے کے لحاظ سے تو انہوں نے (بالکل) درست بتایا۔

سیدنا ابن عباس رضی اللہ عنہما سے روایت ہے کہ ایک شخص نے نبی کریم ﷺ سے پوچھا: اللہ کو کون سی بات سب سے زیادہ محبوب ہے؟ آپ ﷺ نے فرمایا: ”الحال المرتحل (منزل بدلتا رہنے والا)۔“ اس نے پوچھا: یا رسول اللہ! الحال المرتحل کیا ہے؟ آپ ﷺ نے فرمایا: ”قرآن والا، جو اس کے شروع سے (تلاوت) کرتے ہوئے اس کے آخر تک پہنچتا ہے، پھر آخر سے شروع کر کے دوبارہ اس کے شروع تک پہنچتا ہے۔“

سیدنا ابن عباس رضی اللہ عنہما سے روایت ہے، ایک شخص نے کہا: یا رسول اللہ! کیا دوا تقدیر (کے مقابلے) میں کچھ فائدہ دیتی ہے؟ آپ ﷺ نے فرمایا: ”دوا بھی تقدیر ہی میں سے ہے، اور وہ اللہ کے حکم سے فائدہ دے دیتی ہے۔“