المعجم الكبير للطبراني

سیدنا سہل بن سعد رضی اللہ عنہ سے روایت ہے... وہ بوڑھے ہو چکے تھے، یہاں تک کہ اس پر قابو رکھنا مشکل ہو گیا تھا، پھر انہوں نے پانی منگوایا، وضو کیا اور اپنے موزوں پر مسح کیا۔ میں نے کہا: آپ اپنے موزے کیوں نہیں اتارتے؟ انہوں نے فرمایا: ”میں نے اپنے سے بہتر شخص کو ایسا کرتے دیکھا ہے۔“

سیدنا سہل بن سعد رضی اللہ عنہ بیان کرتے ہیں کہ جب غزوہ احد کا دن ہوا اور مشرکین رسول اللہ ﷺ اور آپ کے صحابہ کے پاس سے لوٹ گئے تو عورتیں رسول اللہ ﷺ اور صحابہ کی مدد کے لیے نکلیں، ان میں رسول اللہ ﷺ کی صاحبزادی سیدہ فاطمہ رضی اللہ عنہا بھی تھیں۔ جب وہ رسول اللہ ﷺ سے ملیں تو آپ سے لپٹ گئیں اور پانی سے آپ کے زخم دھونے لگیں، مگر خون اور بڑھتا گیا۔ جب انہوں نے یہ دیکھا تو چٹائی کا ایک ٹکڑا لے کر اسے آگ سے جلایا، پھر اسے زخم پر رکھ کر دبایا یہاں تک کہ وہ زخم سے چپک گیا اور خون بند ہو گیا۔

سیدنا سہل بن سعد رضی اللہ عنہ سے روایت ہے کہ رسول اللہ ﷺ نے فرمایا: ”جس شخص کو نماز میں کوئی بات پیش آئے تو وہ ’سبحان اللہ‘ کہہ کر تسبیح کرے، کیونکہ تسبیح مردوں کے لیے ہے اور تالی بجانا عورتوں کے لیے ہے۔“

سیدنا سہل بن سعد رضی اللہ عنہ سے روایت ہے کہ رسول اللہ ﷺ نے فرمایا: ”بیشک آدمی لوگوں کے سامنے جنتیوں والے عمل کرتا ہے حالانکہ وہ جہنمیوں میں سے ہوتا ہے، اور بیشک آدمی لوگوں کے سامنے جہنمیوں والے عمل کرتا ہے حالانکہ وہ جنتیوں میں سے ہوتا ہے۔“

سیدنا سہل بن سعد رضی اللہ عنہ سے روایت ہے کہ رسول اللہ ﷺ نے فرمایا: ”جنت میں ایک دروازہ ہے جسے ریان کہا جاتا ہے، اس سے صرف روزہ دار ہی داخل ہوں گے، جب وہ سب اس میں داخل ہو جائیں گے تو وہ بند کر دیا جائے گا۔“

سیدنا سہل بن سعد رضی اللہ عنہ کہتے ہیں کہ رسول اللہ ﷺ نے جنت کا ذکر کرتے ہوئے فرمایا: ”اس میں وہ کچھ ہے جو نہ کسی آنکھ نے دیکھا، نہ کسی کان نے سنا، اور نہ کسی انسان کے دل میں اس کا خیال گزرا۔“