المعجم الكبير للطبراني

ابوسلمان مؤذن بیان کرتے ہیں: میں نے سیدنا زید بن ارقم رضی اللہ عنہ کے ساتھ ایک جنازے کی نماز پڑھی تو انہوں نے پانچ تکبیریں کہیں۔ میں نے پوچھا: کیا یہ بھول سے ہوا یا جان بوجھ کر؟ تو انہوں نے کہا: بلکہ جان بوجھ کر، بیشک نبی کریم ﷺ اسی طرح (نماز جنازہ) پڑھا کرتے تھے۔

ابوسلمان مؤذن بیان کرتے ہیں: ابوسریحہ غفاری رضی اللہ عنہ کا انتقال ہوا تو سیدنا زید بن ارقم رضی اللہ عنہ نے ان کی نماز جنازہ پڑھائی اور چار تکبیریں کہیں، اور فرمایا: میں نے رسول اللہ ﷺ کو اسی طرح نماز پڑھتے دیکھا ہے۔

ابوسلمان مؤذن، سیدنا زید بن ارقم رضی اللہ عنہ سے روایت کرتے ہیں، وہ کہتے ہیں: سیدنا علی رضی اللہ عنہ نے لوگوں کو قسم دے کر پوچھا: میں اللہ کا واسطہ دے کر پوچھتا ہوں، کیا کسی نے نبی کریم ﷺ کو یہ فرماتے سنا: ”جس کا میں مولیٰ ہوں، علی اس کے مولیٰ ہیں، اے اللہ! جو ان سے دوستی رکھے تو اس سے دوستی رکھ، اور جو ان سے دشمنی رکھے تو اس سے دشمنی رکھ۔“ تو بارہ بدری صحابہ کھڑے ہوئے اور اس کی گواہی دی۔ سیدنا زید رضی اللہ عنہ کہتے ہیں: اور میں بھی ان لوگوں میں سے تھا جنہوں نے (یہ گواہی دینے میں تاخیر کر کے) چھپایا، تو میری بینائی جاتی رہی۔