المعجم الكبير للطبراني

سیدنا براء بن عازب رضی اللہ عنہ کہتے ہیں: میں اپنے چچا سیدنا حارث بن عمرو رضی اللہ عنہ سے ملا، ان کے ساتھ ایک جھنڈا تھا، میں نے پوچھا: کہاں کا ارادہ ہے؟ انہوں نے کہا: ”رسول اللہ ﷺ نے مجھے ایک ایسے شخص کی طرف بھیجا ہے جس نے اپنے باپ کی بیوی سے نکاح کر لیا ہے، اور مجھے حکم دیا ہے کہ میں اسے قتل کر دوں۔“

سیدنا براء بن عازب رضی اللہ عنہ کہتے ہیں: میرے پاس سے سیدنا حارث بن عمرو رضی اللہ عنہ گزرے، رسول اللہ ﷺ نے انہیں جھنڈا باندھ کر بھیجا تھا، تو میں نے پوچھا: رسول اللہ ﷺ نے آپ کو کہاں بھیجا ہے؟ انہوں نے کہا: ”مجھے ایک ایسے شخص کی طرف بھیجا ہے جس نے اپنے باپ کے بعد اس کی بیوی سے نکاح کر لیا ہے، تاکہ میں اس کی گردن اڑا دوں۔“

سیدنا براء بن عازب رضی اللہ عنہ کہتے ہیں: میں اپنے چچا سے ملا، ان کے ساتھ ایک جھنڈا بندھا ہوا تھا، میں نے پوچھا: کہاں کا ارادہ ہے؟ انہوں نے کہا: ”رسول اللہ ﷺ نے مجھے ایک ایسے شخص کی طرف بھیجا ہے جس نے اپنے باپ کی بیوی سے نکاح کر لیا ہے، تاکہ میں اس کی گردن اڑا دوں اور اس کا مال لے لوں۔“
امام طبرانی رحمہ اللہ فرماتے ہیں: اسی طرح اشعث بن سوار اور زید بن ابی انیسہ نے بھی عدی بن ثابت سے، انہوں نے یزید بن براء سے، انہوں نے اپنے والد سے روایت کی، جس میں وہ کہتے ہیں: میں اپنے چچا سے ملا۔ اور سدی نے ان دونوں کی مخالفت کی، انہوں نے عدی بن ثابت سے، براء سے روایت کی، جس میں وہ کہتے ہیں: میں اپنے ماموں سے ملا۔ اور ان کے ماموں ابوبردہ بن نیار تھے، اور اس روایت میں عدی اور براء کے درمیان یزید کو شامل نہیں کیا۔

سیدنا براء بن عازب رضی اللہ عنہ کہتے ہیں: میں اپنے ماموں سے ملا، ان کے ساتھ ایک جھنڈا تھا، میں نے پوچھا: کہاں جا رہے ہیں؟ انہوں نے کہا: ”رسول اللہ ﷺ نے مجھے ایک ایسے شخص کی طرف بھیجا ہے جس نے اپنے باپ کے بعد اس کی بیوی سے نکاح کر لیا ہے، تاکہ میں اس کی گردن اڑا دوں اور اسے قتل کر دوں۔“