المعجم الكبير للطبراني

محمد بن عبداللہ بن نمیر رحمہ اللہ کہتے ہیں: ”ابوقتادہ کا نام حارث بن ربعی رضی اللہ عنہ ہے، اور ابوقتادہ رضی اللہ عنہ رسول اللہ ﷺ کے شہسواروں میں سے ایک تھے۔“

سیدنا سلمہ بن اکوع رضی اللہ عنہ کہتے ہیں: رسول اللہ ﷺ نے فرمایا: ”آج ہمارا بہترین شہسوار ابوقتادہ ہے۔“ اور رسول اللہ ﷺ نے میضاۃ کے دن ان کے لیے دعا فرمائی۔

سیدنا ابوقتادہ رضی اللہ عنہ کہتے ہیں: ہم رسول اللہ ﷺ کے ساتھ ایک سفر میں تھے کہ آپ ﷺ سواری پر نیند کی وجہ سے جھک گئے، تو میں نے اپنے ہاتھ سے آپ ﷺ کو سہارا دیا یہاں تک کہ آپ بیدار ہو گئے، پھر آپ ﷺ دوبارہ جھکے تو میں نے پھر اپنے ہاتھ سے سہارا دیا یہاں تک کہ آپ بیدار ہو گئے، تو آپ ﷺ نے فرمایا: ”اے اللہ! ابوقتادہ کی حفاظت فرما جیسے اس نے آج رات میری حفاظت کی، ہمیں تو یوں لگتا ہے کہ ہم نے آپ کو مشقت میں ڈال دیا۔“ ”اور ابوقتادہ رضی اللہ عنہ زرد رنگ کا خضاب لگایا کرتے تھے۔“

عثمان بن عبداللہ بن سراقہ رحمہ اللہ کہتے ہیں: میں نے سیدنا ابوقتادہ، سیدنا ابوہریرہ، سیدنا ابن عمر اور سیدنا ابواسید ساعدی رضی اللہ عنہم کو دیکھا کہ وہ ہمارے پاس سے گزرتے تھے، جبکہ ہم مکتب میں بچے تھے، ہم ان سے عنبر کی خوشبو محسوس کرتے تھے اور وہ اپنی داڑھیوں کو زرد رنگ سے رنگتے تھے۔

عمار بن ابی عمار رحمہ اللہ کہتے ہیں: میں نے سیدنا زید بن ثابت، سیدنا ابن عباس، سیدنا ابوہریرہ اور سیدنا ابوقتادہ رضی اللہ عنہم کو دیکھا کہ وہ ریشمی چادریں پہنتے تھے۔

یحییٰ بن بکیر رحمہ اللہ کہتے ہیں: ”ابوقتادہ رضی اللہ عنہ، جن کا نام حارث بن ربعی تھا، سن 54 ہجری میں ستّر سال کی عمر میں فوت ہوئے۔“

محمد بن عبداللہ بن نمیر رحمہ اللہ کہتے ہیں: ”ابوقتادہ حارث بن ربعی رضی اللہ عنہ سن 54 ہجری میں فوت ہوئے۔“