المعجم الكبير للطبراني

سیدنا بدیل بن ورقاء رضی اللہ عنہ کے بیٹے اپنے والد سے روایت کرتے ہیں کہ رسول اللہ ﷺ حدیبیہ کے دن خزاعہ کی جماعت میں تشریف لے گئے، اور انہیں اور بدیل بن ورقاء اور بنی عمرو کے سرداروں کو یہ لکھا: ”تم پر سلامتی ہو؛ میں تمہارے سامنے اس اللہ کی حمد بیان کرتا ہوں جس کے سوا کوئی سچا معبود نہیں، امابعد! میں نے تمہارے معاملے میں کوئی کوتاہی نہیں کی، اور تمہارا کوئی حق ضائع نہیں کیا، اور تہامہ کے باشندوں میں سب سے زیادہ عزت والے میرے نزدیک تم اور تمہارے تابع خوشبودار (مُطَیَّبین) قبیلے والے ہیں، اور میں نے تم میں سے جس نے ہجرت کی اس کے لیے وہی کچھ لیا ہے جو اپنے لیے لیا، چاہے وہ اپنی ہی زمین میں ہجرت کر گیا ہو، مکہ میں نہ رہتا ہو، اور تم میری طرف سے نہ خوف زدہ ہو اور نہ ڈرائے جاؤ گے“ یہ یا اسی جیسے الفاظ تھے۔

سلمہ کہتے ہیں: میرے والد بدیل بن ورقاء رضی اللہ عنہ نے مجھے یہ خط دیا اور کہا: میرے بیٹے! یہ نبی کریم ﷺ کا خط ہے، اس کی اچھی حفاظت کرنا، اور تم ہمیشہ بھلائی میں رہو گے جب تک یہ تمہارے پاس ہے: ”بسم اللہ الرحمٰن الرحیم، محمد رسول اللہ ﷺ کی طرف سے بدیل بن ورقاء اور بُسر اور بنی عمرو کے سرداروں کے نام، میں تمہارے سامنے اس اللہ کی حمد بیان کرتا ہوں جس کے سوا کوئی سچا معبود نہیں، امابعد! میں نے تمہارے معاملے میں کوئی کوتاہی نہیں کی اور تمہارا کوئی حق ضائع نہیں کیا، اور تہامہ میں میرے اہل خانہ میں سے سب سے زیادہ عزت والے میرے نزدیک تم ہو، اور رشتے میں مجھ سے سب سے قریب، اور تمہارے تابع خوشبودار قبیلے والے، تو میں نے تم میں سے جس نے ہجرت کی اس کے لیے وہی کچھ لیا جو اپنے لیے لیا، چاہے وہ اپنی زمین میں ہجرت کر گیا ہو، مکہ میں نہ رہتا ہو سوائے عمرہ یا حج کے لیے، اور میں نے جب تم سے صلح کی، تو تمہارا کوئی حق ضائع نہیں کیا، اور تم میری طرف سے نہ خوف زدہ ہو نہ روکے گئے ہو، امابعد! علقمہ بن علاثہ اور ہوذہ کے دونوں بیٹوں نے اسلام قبول کیا اور بیعت کی، اور عکرمہ کے تابع لوگوں کے ساتھ ہجرت کی، اور ان کے تابع لوگوں میں سے جس نے بھی ہجرت کی اس کے لیے بھی وہی کچھ لیا جو اپنے لیے لیا، اور بے شک کچھ لوگ ہمیشہ سے حل اور حرم دونوں میں ایک دوسرے کا حصہ ہیں“ ابومحمد کہتے ہیں: مجھے میرے والد نے بتایا، انہوں نے کہا: ”میں نے اپنے بزرگوں کو یہ کہتے سنا کہ یہ سیدنا علی بن ابی طالب رضی اللہ عنہ کی تحریر ہے۔“

بدیل بن ورقاء رضی اللہ عنہ کے بیٹے اپنے والد سے روایت کرتے ہیں کہ رسول اللہ ﷺ نے بدیل رضی اللہ عنہ کو حکم دیا کہ قیدیوں اور مال کو جِعرانہ میں روک لیں یہاں تک کہ آپ ﷺ خود وہاں پہنچیں، تو انہیں روک لیا گیا۔