المعجم الأوسط

سیدنا ابوہریرہ رضی اللہ عنہ سے روایت ہے کہ رسول اللہ ﷺ نے فرمایا: ”کیا وہ شخص جو امام سے پہلے اپنا سر اٹھا لیتا ہے، اس بات سے بے خوف ہے کہ اللہ تعالیٰ اس کا سر گدھے کے سر جیسا بنا دے؟“
امام طبرانی رحمہ اللہ فرماتے ہیں: ”اس حدیث کو بحر السقاء سے بقیہ بن ولید کے سوا کسی نے روایت نہیں کیا۔“

سیدنا عبداللہ بن عمر رضی اللہ عنہما سے روایت ہے کہ رسول اللہ ﷺ نے ایک سریہ روانہ فرمایا، میں بھی اس میں شریک تھا، چنانچہ ہمارے حصے میں فی کس بارہ بارہ اونٹ آئے، اور اس کے بعد رسول اللہ ﷺ نے ہمیں ایک ایک اونٹ مزید بطورِ انعام عطا فرمایا۔
امام طبرانی رحمہ اللہ فرماتے ہیں: ”اس حدیث کو زبیدی سے بقیہ کے سوا کسی نے روایت نہیں کیا۔“

سیدنا معاذ بن انس رضی اللہ عنہ سے روایت ہے کہ نبی کریم ﷺ نے فرمایا: ”جس نے غصہ پی لیا، حالانکہ وہ اسے نافذ کرنے پر قدرت رکھتا تھا، اللہ تعالیٰ قیامت کے دن اسے اختیار دے گا کہ حورِ عین میں سے جسے چاہے چن لے۔ اور جس نے عمدہ اور خوبصورت لباس قدرت کے باوجود (عاجزی کی وجہ سے) چھوڑ دیا، اللہ تعالیٰ قیامت کے دن اسے ایمان کی چادر پہنائے گا۔ اور جس نے کسی غلام کا نکاح کروایا، اللہ تعالیٰ قیامت کے دن اس کے سر پر بادشاہی کا تاج رکھے گا۔“
امام طبرانی رحمہ اللہ فرماتے ہیں: ”اس حدیث کو ابراہیم بن ادھم سے بقیہ کے سوا کسی نے روایت نہیں کیا۔“

قتادہ رحمہ اللہ بیان کرتے ہیں کہ میں نے سیدنا انس بن مالک رضی اللہ عنہ سے کہا: ”ہمیں دکھائیے کہ رسول اللہ ﷺ کی نماز کیسی تھی؟“ تو وہ کھڑے ہوئے اور نماز پڑھی، اس میں وہ ہر تکبیر کے ساتھ رفع یدین کرتے تھے، پھر جب نماز سے فارغ ہوئے تو فرمایا: ”رسول اللہ ﷺ کی نماز اسی طرح ہوا کرتی تھی۔“
امام طبرانی رحمہ اللہ فرماتے ہیں: ”اس حدیث کو قتادہ سے، انہوں نے انس رضی اللہ عنہ سے، عرزمی کے سوا کسی نے روایت نہیں کیا۔“