المعجم الأوسط

سیدنا عبداللہ بن عمرو رضی اللہ عنہما سے روایت ہے کہ نبی کریم ﷺ جب سفر میں جلدی ہوتی تو مغرب اور عشاء کو جمع فرما لیا کرتے تھے۔
(امام طبرانی رحمہ اللہ فرماتے ہیں:) ”اس حدیث کو عبدالکریم رحمہ اللہ سے سفیان بن عیینہ رحمہ اللہ کے سوا کسی نے روایت نہیں کیا، اس کی روایت میں ابو مسلم رحمہ اللہ منفرد ہیں۔“
(محقق کا حاشیہ:) دار الحرمین اور طحان کے مطبوعہ نسخوں میں اسی طرح ہے، اور سلیمانیہ کے نسخے میں بھی ایسا ہی ہے، لیکن یہ غلط اضافہ ہے، کیونکہ ابو مسلم مستملی ہی عبدالرحمن بن یونس ہیں، اور مصنف کے ہاں کئی مقامات پر یہ درست طور پر آیا ہے؛ ان کا ترجمہ تہذیبین وغیرہ میں دیکھیے۔

ام المومنین سیدہ عائشہ رضی اللہ عنہا نے فرمایا: ”سنت میں سے یہ ہے کہ تم میں سے کوئی عورت اپنے ہاتھوں یا پاؤں یا گردن یا کانوں میں کوئی زیور پہنے رکھے، (اور) جب اسے غسل کی چارپائی پر رکھا جائے تو وہ اس سے اتار لیا جائے۔“
(امام طبرانی رحمہ اللہ فرماتے ہیں:) ”یہ حدیث ام عوانہ سے صرف اسی سند سے مروی ہے، اور اس کی روایت میں لاحقی رحمہ اللہ منفرد ہیں۔“

عبداللہ بن یعلیٰ لیثی رحمہ اللہ، جو بصرہ کے قاضی تھے، سے روایت ہے کہ سیدنا معقل بن یسار رضی اللہ عنہ نے اپنا ایک مکان ایک لاکھ میں بیچا تو فرمایا: ”میں نے رسول اللہ ﷺ کو فرماتے ہوئے سنا: ”جو شخص بلا ضرورت جائیداد بیچتا ہے، اللہ تعالیٰ اس کے (مال) کو تباہ کرنے والی کوئی آفت بھیج دیتا ہے جو اسے برباد کر دیتی ہے۔“
امام طبرانی رحمہ اللہ فرماتے ہیں: ”اس حدیث کو حفص بن ابی حرب سے علی بن عثمان لاحقی کے سوا کسی نے روایت نہیں کیا۔“

سیدنا ابوہریرہ رضی اللہ عنہ سے روایت ہے کہ نبی کریم ﷺ نے فرمایا: ”امام (نماز کا) ضامن ہے اور مؤذن امانت دار ہے۔ «اللَّهُمَّ أَرْشِدِ الْأَئِمَّةَ، وَاغْفِرْ لِلْمُؤَذِّنِينَ» اے اللہ! اماموں کو راہِ راست پر رکھ اور مؤذنوں کی مغفرت فرما۔“

سیدنا جابر رضی اللہ عنہما سے روایت ہے کہ رسول اللہ ﷺ نے پانی بیچنے سے منع فرمایا۔
امام طبرانی رحمہ اللہ فرماتے ہیں: ”اس حدیث کو ایوب سے حسین بن واقد کے سوا کسی نے روایت نہیں کیا، اور فضل بن موسیٰ اسے بیان کرنے میں منفرد ہیں۔“