المعجم الأوسط

ام المومنین سیدہ حفصہ رضی اللہ عنہا سے روایت ہے کہ انہوں نے فرمایا: ”میں نے رسول اللہ ﷺ کو (اپنی وفات سے پہلے) نفل نماز میں کبھی بیٹھے ہوئے نہیں دیکھا، یہاں تک کہ آپ ﷺ کی وفات سے ایک یا دو سال پہلے میں نے آپ ﷺ کو اپنی نفل نماز بیٹھ کر پڑھتے دیکھا، آپ ﷺ سورت کو ٹھہر ٹھہر کر اس طرح ترتیل سے پڑھتے کہ اس کی قراءت اپنے سے لمبی سورت سے بھی زیادہ طویل ہو جاتی۔“

سیدنا انس بن مالک رضی اللہ عنہ سے روایت ہے کہ رسول اللہ ﷺ گھوڑے پر سوار ہوئے تو اس سے گر پڑے، جس سے آپ ﷺ کا دایاں پہلو چھل گیا۔ ایک دن آپ ﷺ نے ہمیں کوئی نماز بیٹھ کر پڑھائی تو ہم نے بھی آپ ﷺ کے پیچھے بیٹھ کر نماز پڑھی۔ پھر جب آپ ﷺ نے سلام پھیرا تو فرمایا: ”امام اسی لیے مقرر کیا جاتا ہے کہ اس کی پیروی کی جائے، لہٰذا جب امام کھڑے ہو کر نماز پڑھے تو تم بھی کھڑے ہو کر پڑھو، اور جب وہ رکوع کرے تو تم رکوع کرو، اور جب وہ (سر) اٹھائے تو تم اٹھاؤ، اور جب وہ سجدہ کرے تو تم سجدہ کرو، اور جب وہ «سَمِعَ اللَّهُ لِمَنْ حَمِدَهُ» کہے تو تم «رَبَّنَا وَلَكَ الْحَمْدُ» کہو، اور جب وہ بیٹھ کر نماز پڑھے تو تم سب بھی بیٹھ کر نماز پڑھو۔“

سیدنا ابوہریرہ رضی اللہ عنہ سے روایت ہے کہ رسول اللہ ﷺ نے فرمایا: ”جو شخص نماز یعنی جمعہ کے لیے سویرے جاتا ہے اس کی مثال اس شخص کی سی ہے جو اونٹنی قربانی کے طور پر پیش کرتا ہے، پھر اس کے بعد آنے والا اس شخص کی طرح ہے جو گائے پیش کرتا ہے، پھر اس کے بعد آنے والا اس شخص کی طرح ہے جو مینڈھا پیش کرتا ہے، پھر اس کے بعد آنے والا اس شخص کی طرح ہے جو مرغی پیش کرتا ہے، پھر اس کے بعد آنے والا اس شخص کی طرح ہے جو انڈا پیش کرتا ہے۔“

سیدنا علی رضی اللہ عنہ سے روایت ہے کہ نبی کریم ﷺ نے فرمایا: ”(عبادت کی نیت سے) سفر کا سامان صرف تین مسجدوں کی طرف باندھا جائے: میری اس مسجد کی طرف، مسجد حرام کی طرف اور مسجد اقصیٰ کی طرف۔ اور عورت دو دن (کی مسافت) سے زیادہ سفر نہ کرے مگر اس حال میں کہ اس کے ساتھ اس کا شوہر یا کوئی محرم ہو۔ اور سال میں دو دن روزہ نہ رکھا جائے: عید الفطر کا دن اور عید الاضحیٰ کا دن۔ اور دو نمازوں کے بعد (نفل) نماز نہیں: فجر کی نماز کے بعد یہاں تک کہ سورج طلوع ہو جائے، اور عصر کی نماز کے بعد یہاں تک کہ سورج غروب ہو جائے۔“

ام المومنین سیدہ عائشہ رضی اللہ عنہا بیان کرتی ہیں: ”میں نے نبی کریم ﷺ کا ہاتھ تھام لیا اور وہ کلمات کہنے لگی جو میں آپ ﷺ کو مریض کی عیادت کے وقت فرماتے سنا کرتی تھی: «امْسَحِ الْبَاسَ، رَبَّ النَّاسِ، وَاشْفِ أَنْتَ الشَّافِي، لَا شَافِيَ إِلَّا أَنْتَ» ”اے لوگوں کے رب! تکلیف دور فرما دے اور شفا عطا فرما، تو ہی شفا دینے والا ہے، تیرے سوا کوئی شفا دینے والا نہیں۔“ تو آپ ﷺ نے اپنا سر اٹھایا اور فرمایا: «بَلِ اللَّهُمَّ مَعَ الرَّفِيقِ الْأَعْلَى، بَلِ اللَّهُمَّ مَعَ الرَّفِيقِ الْأَعْلَى» ”(نہیں) بلکہ اے اللہ! مجھے رفیقِ اعلیٰ کے ساتھ ملا دے، بلکہ اے اللہ! مجھے رفیقِ اعلیٰ کے ساتھ ملا دے۔““

ام المومنین سیدہ عائشہ رضی اللہ عنہا سے روایت ہے کہ نبی کریم ﷺ نے اپنے صحابہ رضی اللہ عنہم سے پوچھا: ”تم میں سے کس نے آج روزے کی حالت میں صبح کی؟“ سیدنا ابوبکر رضی اللہ عنہ نے عرض کیا: ”میں نے۔“ آپ ﷺ نے پوچھا: ”تم میں سے کس نے آج کسی مریض کی عیادت کی؟“ سیدنا ابوبکر رضی اللہ عنہ نے عرض کیا: ”میں نے۔“ آپ ﷺ نے پوچھا: ”تم میں سے کون آج کسی جنازے کے ساتھ گیا؟“ سیدنا ابوبکر رضی اللہ عنہ نے عرض کیا: ”میں۔“ تو نبی کریم ﷺ نے فرمایا: ”مبارک ہو! جس شخص میں یہ سب خصلتیں جمع ہو جائیں، اللہ تعالیٰ اس کے لیے جنت میں ایک گھر بنا دیتا ہے۔“
امام طبرانی رحمہ اللہ فرماتے ہیں: ”ان احادیث کو سلمہ بن کہیل رحمہ اللہ سے ان کے بیٹے یحییٰ کے سوا کسی نے روایت نہیں کیا، اور ان کے والد سے یہ روایت صرف اسی سند سے مروی ہے۔“